VOV4.Xơ Đăng - Cheăm Quảng Khê tơring Dak Glong, kong pơlê Dak Nông, môi tung mâu tơring kơtiê má môi dêi lâp tơnêi têa. Ki hên kơxô̆ kuăn pơlê cho hdroâng kuăn ngo, tơdroăng rêh ối kơtiê xơpá, la kuăn pơlê rơtế môi tuăn ƀă dêi rơpó môi tuăn ƀă mâu kăn cheăm pê klêi tơdroăng mơjiâng thôn pơlê nếo. Mâu hâi apoăng rơnó hơngui,  pó vâi krâ nhŏng o ƀă pú hmâ rơtế ƀă ngế chêh hlá tơbeăng Minh Huệ troh xah hêi ro ƀă vâi krâ nhŏng o kơpong hngế hngo cheăm Quảng Khê, tơring Dak Glong, kong pơlê Dak Nông.

Toăng hngêi ki kŭn lĕm dÊi rơpŏng pôa K’Prum, a ƀon Phi Mur, cheăm Quảng Khê, ai to rơkong tó hơniâp ro. Hâi kố mâu vâi kuăn ‘nĕng cháu chái ƀă vâi krâ nhŏng o ki rêh ối a chê rơtế troh xah hêi rơkâu hâi rơnó HhHơngui. Pôa ăm ‘nâi, rơnó krí kơphế kố nah, châ xo 3 tâ̆n kloăng kơphế, tê châ lối 120 rơtuh liăn. Kuăn ‘nĕng hiăng kân hdrah tâi xo on veăng ối krê, mê kơxô̆ liăn ki kố xuân bê tŭm ăm on veăng pôa rêh ối ƀă pêi klâng chiâk.

Troăng lăm tơkâ luâ pơlê Phi Mur

Pôa K’Prum tối tiah kố, ôh ti xê to rơpŏng pôa, mê tâi tâng vâi krâ nhŏng o tung pơlê pơrá ai tơdroăng rêh ối tơniăn lĕm tâ kơnôm ing tơdjuôm ivá mơjiâng thôn pơlê nếo.

“Sap ing ai troăng prôk ki nếo klêi pro, ai hngêi trăng tơniăn lĕm á hlo vâi krâ nhŏng o tung pơlê pêi cheăng kâ xuân chía tơtêk tâ, tơ’lêi hlâu tâ, kuăn ‘nĕng hriâm tâp xuân tơ’lêi hlâu tâ, prôk lăm tung pơlê, cheăm troh lăm pôu dêi rơpó xuân tơ’lêi hlâu tâ há. Mơjiâng thôn pơlê nếo, vâi krâ nhŏng o ngin môi tuăn ƀă khât ƀă tơdroăng ki pleăng tơnêi pro troăng, pro kế tơmeăm ki ê tung pơlê”.

Tối tơdroăng rêh ối nếo, pôa K’Krang, krâ pơlê Phi Mur, phiu ro: nôkố ki hên môi tiah rơpŏng ki lâi xuân hiăng ai hngêi trăng mơjiâng pro lĕm. Mê cho xua kơnôm ing tơdroăng ki môi tuăn tơrŭm tŏng kum hriâm ƀối ing dêi rơpó, rơtế ƀă dêi rơpó mơnhông mơdêk cheăng kâ. Ki xiâm cho tung mơjiâng thôn pơlê nếo, drêng tơnêi têa ai troăng hơlâ mơjiâng pro hngêi trăng, troăng klông, mê vâi krâ nhŏng o hbrâ rơnáu pleăng tơnêi, ƀă kum hâi pêi cheăng.

Môi tiah rơpŏng pôa hiăng pleăng 60m tơnêi ‘na ngiâ hngêi, ƀă lối 100m  tơnêi tơkâ luâ chiâk, vâ po rơdâ troăng prôk tung pơlê ƀă lo a kơpong ki pêi chiâk deăng. Pôa K’Krang, krâ pơlê, ăm ‘nâi:

“Vâi krâ nhŏng o tung pơlê Phi Mur mơngế Xuăn xuân môi tiah hdroâng kuăn ngo a kố tơrŭm môi hiâm mơno, rơtế ƀă dêi rơpó veăng kum pro troăng prôk, mê nếo ai troăng prôk lĕm, krúa mot tung thôn, tung cheăm, troăng lăm a chiâk deăng phuâng lĕm vâ prôk lăm chơ kế tơmeăm, chơ phon rơvât tơ’lêi hlâu ƀă hên ki ê.

Mơngế Xuăn ƀă hdroâng kuăn ngo akố rêh ối ƀă dêi rơpó lĕm tro khât, ôh tá ai tơdroăng ki tơxup tơbriât, tơtŭng tơpeăng dêi rơpó, rơtế ƀă dêi rơpó mơjiâng pơlê, cheăm mơnhông tơtêk”.

A tơdế cheăm Quảng Khê

A tơring Dak Glong, môi tung mâu tơring kơtiê má môi dêi tơnêi têa châ xúa tơdroăng 30A, cheăm Quảng Khê ki hên pơ’leăng mâ mơngế cho hdroâng kuăn ngo. Pôa Nguyễn Tiến Duẩn, kăn hnê ngăn Vi ƀan cheăm Quảng Khê, ăm ‘nâi, mâu hơnăm hdrối mê hía nah. Tơdroăng pơkâ dêi Đảng tơtro ƀă hiâm mơno kuăn pơlê hiăng veăng kum Quảng Khê pêi pro klêi 19 tơdroăng pơkâ mơjiâng thôn pơlê néo. Troh nôkố tá 9 to pơlê ƀă 3 to thôn dêi cheăm hiăng ai troăng prôk tơdrăng, hngêi trăng troăng klông hiăng châ pro tơniăn lĕm.

Sap ing cheăm ki malối xơpá ai tơdế pơ’leăng mâ mơngế ối tung rơpŏng kơtiê, mê nôkố Quảng Khê bu ối tá hâi châ troh 7% rơpŏng kơtiê ƀă 8% rơpŏng vâ chê kơtiê.

Vâ thôn pơlê rế hía rế hơ’lêh, khu droh rơtăm a cheăm hiăng rak vế mâu tơdroăng cheăng hâi tơdrốu pleăng dêi hnoăng, hâi tĭng ngiât, rơtế ƀă kuăn pơlê đi đo mơgrúa lĕm kong prâi tơnêi tíu, pêt hên loăng ngiât a mâu troăng prôk. Pakĭng tơdroăng ki ‘no liăn cheăng dêi tơnêi têa, mâu chi ƀô̆, khu rak ngăn thôn, pơlê ƀă mâu ngế ki châ kuăn pơlê loi nhuô̆m tung pơlê pơla xuân đi đo ối achê tŏng kum mơhnhôk vâi krâ nhŏng pơtối mơ-eăm pêi chiâk deăng, rak vế mơjiâng thôn pơlê nếo rế hía rế kro mơdrŏng.

Pôa Nguyễn Tiến Duẩn, ăm ‘nâi:

“ ‘Na mơjiâng thôn pơlê nếo mê châ vâi krâ nhŏng o kuăn pơlê môi tuăn khât, mê troh hơnăm 2021 cheăm Quảng Khê hiăng pêi klêi cheăm thôn pơlê nếo. Tơdroăng pơkâ dêi Đảng ủy xuân môi tiah tơdroăng pơkâ dêi Hô̆i đong hnê ngăn cheăm mê kô pơtối pơkâ mâu troăng hơlâ ‘no liăn pro hngêi trăng troăng klông xuân môi tiah cho mơhnhôk hiâm mơno, liăn ngân dêi kuăn pơlê rơtế tơdjuôm ivá môi hiâm mơno vâ mơjiâng thôn pơlê tiô túa nếo tung la ngiâ”.

Môi rơnó Hơngui nếo dế vêh tơhrâ kô djâ hên tơdroăng ki hơ’lêh a kơpong tơnêi hngế hngo Quảng Khê, Dak Glong, kong pơlê Dak Nông.

Katarina Nga tơplôu ƀă tơbleăng