H’Dốk Êban ối a ƀuôn Ea Mấp, pơlê kân Ea Pôč, tơring Čŭ Mgar, kong pơlê Dak Lak nếo klêi pôe dêi báu rơnó khía rơxăm. Chât kơxâk báu châ ‘măn pơtăng klêng troh a kuâ hngêi. Nâ H’Dốk ăm ‘nâi, rơpŏng hngêi nâ ƀă vâi krâ nhŏng o tung pơlê nôkố ôh tá tô tuăn to lâi xếo ‘na hmê kâ. Kih thuât pêt báu châ ‘mâi hơ’lêh, báu kơpâu châ 4 troh 6 tâ̆n tung ha, tơniăn ăm hên rơpŏng ôh tá xê to ai hmê kâ phâi mê ôi châ tê dêi báu iâ vâ tăng tơ’nôm liăn. Nâ H’Dốk, ai pơ’lêh nôkố kơnôm mâu tíu tơrŭm pro nhŏng o, cho khu hnê mơhnhôk cheăng kong pơlê Dak Lak ƀă kŏng ti veăng tơlo liăn mơhno túa lĕm tro kong pơlê hiăng rơtế ƀă kăn ƀô̆ hnê mơhnôk pêi chiâk mơ-eăm râng kŏng hnê rơkong tơpui.

“Kơnôm ai tơdroăng veăng hnê mê á xuân pêi ƀối, báu xú hŏm tung 200m2 mê châ 2 kơxâk báu, ối báu lai xuân tung 200m2 mê châ 4 kơxâk, báu xú hŏm ai báu ki ‘nâ tâng gá chiâng châ hên. Drêng nếo mơdâ pêt rơvât phon sulfat, troh báu hiăng kân rơvât phon tơ’nôm 2 hdroh NPK hiăng hôm’’.

Pôa Y Tha Mlô, Kăn hnê ngăn chi ƀô̆ ƀuôn Ea Mấp tối, tâi tâng tung pơlê nôkố ai 535 rơpŏng ƀă bú ai 24 rơpŏng kơtiê. Kơxô̆ rơpŏng kơtiê xuân rế kơdroh xua to lâi hơnăm kố kuăn pơlê đi đo châ báu hên tê hlối ai yă. Tơdrêng ƀă tơdroăng pơhlêh thôn pơlê, tơ’nôm ƀă tơdroăng tơ’mot đảng viên hơnăm 2004 troh nôkố, pơlê kô hiăng ai 1 chi ƀô̆ ƀă 17 đảng viên. Mâu tơdroăng ăm hlo ai hnoăng veăng ‘no kân dêi khu cheăng kal kí tơdrêng ƀă tơdroăng hnê mơhnhôk cheăng malối cho tơdroăng  pro nhŏng o pơla mâu kơ koan, tíu pêi cheăng ƀă pơlê. Pôa Y Tha Mlô tối.

“Tung mâu hơnăm mâu vâi pú tung tíu pêi cheăng pro nhŏng o ‘na mâu ngế  pú tơpui tơno kum pơlê ai mâu troăng prôk ki nếo. Malối ‘na mơnhông cheăng kâ mơhé tíu pêi cheăng pro nhŏng o la liăn ôh pa ai, malối cho tơdroăng tuăn pâ ƀă tơdroăng hnê mơhno dêi vâi, klêi mê pơlê, thôn ai kăn ƀô̆ tăng ‘nâi plĕng mơhnhôk kuăn pơlê pêi pro mâu troăng hơlâ mơnhông cheăng kâ, rêh ối klêi mê tơniăn ‘na cheăng lêng kring tơniăn tung pơlê’’.

Tiô pôa Hùng Chiến Thắng, Kăn hnê ngăn cheăng Đảng kong pơlê, Ngế phŏ hnê mơhnhôk cheăng kong pơlê Dak Lak, cho tíu pêi cheăng pro nhŏng o ƀă pơlê Ea Mấp, châ tơƀrê tung tơdroăng pơ’lêh ki hlê plĕng dêi kuăn pơlê cho tơdroăng tơrŭm nhŏng o thế achê kuăn pơlê ƀă hlê kuăn pơlê.  

Xua mê, klêi pro nhŏng o, tíu pêi cheăng hiăng mơjiâng khu hnê mơhno, séa ngăn khât tơdroăng a pơlê vâ mơjiâng tơdroăng pơkâ kum ăm tơtro. Ƀă mâu rơpŏng ki xơpá ôh tá ai tơnêi pêi kâ tíu pêi cheăng mơhnhôk tăng kơxô̆ liăn vâ kơjo gum mơnăn păn, ăm hdrê păn, tơrŭm ƀă khu mơdró tơbleăng mơhno tơdroăng cheăng pêi. Ƀă mâu rơpŏng xơpá ôh tá ai tơnêi pêi kâ, tíu pêi cheăng ki thế mâu kăn ƀô̆ hnê pêi chiâk troh hnê kuăn pơlê.

Rêm khế, tíu pêi cheăng xuân rah đảng viên troh veăng rơtế ƀă chi ƀô̆ vâ teăm tăng ‘nâi plĕng tơdroăng tuăn tơmiêt, púi vâ ƀă tah ki xơpá tơvâ tơvân dêi kuăn pơlê:

“Pêi pro tiô troăng rơhlâ mơjiâng chi ƀô̆ 4 tro dêi Khu pơkuâ ngăn cheăng Đảng, Khu hnê mơhnhôk cheăng ngin xuân tơkŭm po tơdroăng tơrŭm ƀă chi ƀô̆ dêi pơlê rêm khế ngin tăng đảng viên ki lâi rơtế veăng lăm hôp vâ kơjo kum chi ƀô̆ mơjiâng mâu pơkâ xuân môi tiah tơleăng mơnhên mâu tơdroăng a pơlê cheăm. Ing mê tăng ‘nâi plĕng  tơdoăng mơjiâng a pơlê ăm tơtro tâ’’.

20 hơnăm hdrối kong pơlê hiăng ai 1 rơpâu 780 kơ koan, tíu pêi cheăng, khu mơdró pro nhŏng o ƀă 556 to pơlê kuăn ngo. Tiô khu kăn pơkuâ hnê ngăn cheăng Đảng kong pơlê Dak Lak, tơdroăng pro nhŏng o tung mâu hơnăm hdrối nah hiăng mơhno kô cho môi troăng hơlâ ki ‘ló, tro tuăn kuăn pơlê, ai pơxúa kal kí pơlê pơla, túa vêa vong. Vâ mơdêk tơƀrê tâi tâng ai pơxúa dêi tơdroăng cheăng mê, Dak Lak kô pơtối hơ’lêh tơtro ƀă tơdroăng púi vâ dêi kuăn pơlê.

Pôa Nguyễn Đình Trung, ngế cheăng tung tíu xiâm Đảng, Kăn hnê ngăn cheăng Đảng kong pơlê Dak Lak tối tiah kố, pro nhŏng o ôh tá xê to tơdroăng pro hmâ pơla mâu tíu pêi cheăng, khu mơdró ƀă kuăn pơlê tung pơlê mê thế ai veăng dêi mâu khu râ ủy, mâu kăn kong pơlê.

 “Mâu kơ koan, tíu pêi cheăng pro nhŏng o thế mơdêk tâ nếo tơrŭm ƀă râ ủy, mâu kăn cheăm vâ teăm tăng ‘nâi tuăn tơmiât, tơdroăng púi vâ, tơdroăng rêh ối dêi kuăn pơlê ki pro nhŏng o, ing mê, pơkâ mâu troăng rơhlâ gum, kơjo kum ai pơxúa, tơtro ƀă tơdroăng ai khât ƀă tơdroăng cheăng tung tơdroăng rêh ối nếo nôkố. Pakĭng mê, hbrâ tơpui ‘na mâu tơdroăng pá, tơvâ tơvân tung tơdroăng tơbleăng pêi tơdroăng pro nhŏng o”.

Pro nhŏng o châ ngăn môi rôh tơdjêp pro hmâ, rơtế ƀă kuăn pơlê, chiâng môi túa lĕm tro tung tơdroăng rêh ối, mơnhông tơdroăng hlê ăm kuăn pơlê mâu hdroâng kuăn ngo Việt Nam. 20 hơnăm hdrối, túa vêa vong lĕm tro hiăng xua tung môi troăng hơlâ ki kân dêi Khu kăn pơkuâ hnê ngăn cheăng Đảng kong pơlê Dak Lak, châ pơhlêh ƀă tơdroăng pro nhŏng o pơla mâu kơ koan, tíu pêi cheăng tơrêm thôn, pơlê, kuăn ngo, ing mê thăm pro lĕm môi tuăn dêi rơpó tung tâi tâng kuăn pơlê; veăng rak tơniăn kal kí, tơniăn rêh ối pơlê pơla, mơnhông tơdroăng rêh ối, tơmeăm khoăng, mơdêk tuăn ngôa dêi kuăn pơlê kơpong hdroâng kuăn ngo.