VOV4.Sedang - Kơxo lơ 22/4, Khu xiâm pơkuâ tơdroăng loi tĭng tiô khôp hiăng pêi cheăng ƀă Khu pơkuâ cheăng Đảng kong pơlê Quảng Bình ‘na Pơkâ tơkŭm po mâu tơdroăng leh tơbâ 110 hơnăm Hâi kot mâ Đăi tươ̆ng Võ Nguyên Giáp (25/8) râ tơnêi têa a kong pơlê Quảng Bình. Tiô pơkâ, kong pơlê Quảng Bình tơrŭm ƀă mâu khu râ, khu xiâm, kơvâ cheăng tơnêi têa tơkŭm po leh tơbâ 110 hơnăm Hâi kot mâ Đăi tươ̆ng Võ Nguyên Giáp; Hneăng hôp tơpui tơno khoa hok râ Tơnêi têa leh tơbâ 110 hơnăm Hâi kot mâ Đăi tươ̆ng Võ Nguyên Giáp.

Pôa Vũ Đại Thắng, Kăn pơkuâ hnê ngăn cheăng Đảng kong pơlê Quảng Bình tối ăm ‘nâi, leh tơbâ 110 hơnăm Hâi kot mâ Đăi tươ̆ng Võ Nguyên Giáp cho roh vâ pơ-ôu pơ-eăng ƀă mơnê mâu hnoăng kân kĭn dêi Đăi tươ̆ng Võ Nguyên Giáp  ƀă  tơdroăng tơplâ xâ tơleăng lĕm hdroâng mơngế, môi tuăn tơnêi têa, mơjiâng ƀă kring vế Tơnêi têa; pâ vế mâu tơdroăng nhuô̆m pâ krih tơviah, tơdroăng tơmâng trâu hơngế dêi Đăi tươ̆ng ƀă Kuăn pơlê lâp tơnêi têa tối tơdjuôm ƀă kuăn pơlê kong pơlê Quảng Bình tối krê.

A Sa Ly tơplôu ƀă tơbleăng