VOV4.Sêdang - Tơbâ 114 hơnăm hâi kot mâ pôa Lê Duẩn, kăn xiâm pơkuâ ngăn Đảng hâi lơ (7/4/1907- 7/4/2021), kơxo lơ 5/4, khu pơkuâ hnê ngăn Đảng pơlê kong kơdrâm Đông Hà, kong pơlê Quảng Trị tơkŭm po leh pleăng reăng a Tíu meăn um pôa Lê Duẩn, kăn xiâm pơkuâ ngăn Đảng hneăng hdrối nah. A rôh leh, kăn pơkuâ pơlê kong kơdrâm Đông Hà rơtế ƀă kăn ƀô̆, mơngế pơkuâ, mâu ngế pêi cheăng pơlê kong kơdrâm hơ’muăn tối tơdroăng rêh ối, hnoăng cheăng kăch măng khên tơnôu dêi pôa Lê Duẩn, kăn xiâm pơkuâ ngăn Đảng.

Pâ mơnê pleăng reăng a um meăn pôa Lê Duẩn, mâu kăn tối tiah kố, ‘nâi pâ mơnê trâu hơngế khât kơ kăn pơkuâ ki rơkê dêi kăch măng Việt Nam, ngế hok tro rơkê dêi Hồ Chí Minh, kăn xiâm hnê ngăn tơnêi têa, ngế kuăn ki rơkê dêi pơlê Quảng Trị hiăng ai mâu ivá pleăng kân kĭn ăm hnoăng cheăng tơleăng hdroâng mơngế, pro tơnêi têa tơrŭm chiâng môi.

Drêng kố, kăn pơkuâ pơlê kong kơdrâm, Hô̆i đong hnê ngăn, Vi ƀan hnê ngăn kuăn pơlê, Vi ƀan xiâm Măt trâ̆n tơnêi têa Việt Nam pơlê kong kơdrâm Đông Hà rơtế ƀă kăn ƀô̆, mơngế pơkuâ, mâu ngế pêi cheăng mơhno tối ivá mơ-eăm mơdêk hiâm mơno tơrŭm, hriâm tâp ƀă pêi pro tiô troăng tơdjâ hiâm mơno Hồ Chí Minh.

Katarina Nga tơplôu ƀă tơbleăng