VOV4.Sêdang - A Hà Nội, Tổng Liên đoân pêi cheăng Việt Nam nếo tơkŭm po Leh tơbâ 135 hơnăm Hâi lâp plâi tơnêi pêi cheăng 1/5/1886 – 1/5/2021, mơhnhôk Khế Kŏng nhân. Troh veăng ƀă xông tơpui a roh leh, pôa Nguyễn Xuân Phúc, Kăn xiâm hnê ngăn tơnêi têa tối nhên, tung  tơdroăng mơnhông mơdêk dêi kăch măng Đảng, Tơnêi têa ƀă kuăn pơlê pin đi đo châ tơmâng tŏng kum, rak ngăn ki rơhêng vâ tối troh yai kâp kŏng nhân, mơngế pêi cheăng ƀă khu kŏng đoân.

Ki rơhêng vâ tối klêi kơ’nâi 30 hơnăm hơ’leh nếo kŏng nhân ƀă mơngế pêi cheăng dế ai mâ tung tâi tâng mâu kơvâ cheăng, mâu khu pêi cheăng kâ, mâu khu ki djâ troăng ahdrối tung tơdroăng pêi cheăng xúa kơmăi kơmok rơxông nếo, djâ tơnêi têa prôk troăng rơxông nếo ƀă pêi pro tơdroăng pói vâ dêi hdroâng mơngế.

Kăn xiâm hnê ngăn tơnêi têa kheăn kơdeăn mâu khu râ kŏng đoân hiăng pêi pro kơtăng hnê mơhno dêi Khu pơkuâ hnê ngăn cheăng Đảng mơ-eăm, tơmiât rơkê pêi pro mâu tơdroăng ki ai pơxúa vâ chê 10 hơnăm hiăng hluâ Khế kŏng nhân kô chiâng mâu hâi kơdrâm dêi mơngế kŏng nhân, mơngế pêi cheăng lâp tơnêi têa.

Kăn xiâm hnê ngăn tơnêi têa kheăn kơdeăn mâu tơdroăng pêi rơkê dêi đoân viên, mơngế pêi cheăng lâp tơnêi têa xua tơdroăng ki xông kân dêi khu tê mơdró dêi kơ koan, tíu cheăng ƀă tơdroăng mơnhông mơdêk dêi tơnêi têa. Tơdrêng amê pơkâ thế Khu pêi cheăng Kŏng đoân rĕng mơjiâng tơdroăng pêi cheăng dêi Kŏng đoân Việt Nam pêi pro Pơkâ hneăng hôp roh má 13 dêi Đảng tơniăn tiô khoa hok inhên, ƀă chiâng pêi pro.

*** A rôh Leh, teăng mâ Khu hnê mơhno Khế pêi pro ‘na tơniăn, krúa tung pêi cheăng Tơnêi têa, pôa Đào Ngọc Dung, ngế xiâm ngăn cheăng pêi mố đô̆i rong ƀă pơlê pơla hiăng tơbleăng Khế pêi pro ‘na Tơniăn, krúa lĕm tung pêi cheăng hơnăm 2021 ƀă inâi “Mơdêk séa ngăn, mơnhên tối mâu tơdroăng ki mơni kô trâm ôh tá mơhúa, krúa tung pêi cheăng ƀă veăng pêi pro tơniăn sinh viên”.

Leh tơbleăng Khế Kŏng nhân, Khế pêi pro ‘na rak tơniăn, krúa lĕm pêi cheăng hơnăm 2021

Tơbleăng Khế pêi pro ‘na tơniăn pêi cheăng hơnăm 2021, Khu xiâm ngăn tơdroăng cheăng pơkâ thế rêm râ Kong đoân mơdêk tối tơbleăng mâu tơdroăng tơ’noăng ƀă mơdêk tơƀrê tơdroăng tơ’noăng khu lêng ƀă kuăn pơlê pêi hnoăng cheăng tơniăn tung pêi cheăng tro ƀă hnoăng cheăng hbrâ mơdât pơreăng COVID-19.

Pakĭng mê, mơdêk tơdroăng ki mơnhông ‘na kơxô̆ ngế, mơdêk ki rơkê plĕng ƀă ki tơƀrê tung tơdroăng cheăng ‘na tơniăn pro krúa a mâu tíu ki mơjiâng pro; khĕn kơdeăn tơdrêng mâu đoân viên, mâu ngế pêi cheăng ki ai tuăn tơmiât rơkê plĕng tung pêi cheăng ƀă hơ’leh ‘na kih thuât, hơ’leh tơdroăng cheăng pêi, mơdêk ki rơkê plĕng tung pêi cheăng ƀă rak tơniăn pêi cheăng; mơdêk mâu tơdroăng cheăng tơrŭm tung séa ngăn ‘na tơdroăng tơniăn tung pêi cheăng.

Gương - A Sa Ly tơplôu ƀă tơbleăng