VOV4.Sêdang - Kơxê lơ 10/6, a Hngêi Kuô̆k hô̆i hiăng tơkŭm po hôp khu chêh hlá tơbeăng tơbleăng pơkâ dêi Hô̆i đong tâ phĭu Tơnêi têa ‘na tơdroăng tâ phĭu ƀă inâi mâu ngế châ rah xo to pro kăn teăng mâ Kuô̆k hô̆i hneăng má XV. Pơtối mê, 499 ngế châ rah xo to pro kăn teăng mâ Kuô̆k hô̆i hneăng má XV. Xông tơpui pơxiâm po hôp khu chêh hlá tơbeăng, pôa Trần Thanh Mẫn – Kăn cheăng tung Khu xiâm kal kí, Kăn xiâm phŏ hnê ngăn Kuô̆k hô̆i, Kăn xiâm phŏ hnê ngăn Hô̆i đong tâ phĭu Tơnêi têa tối ăm ‘nâi, roh tâ phĭu tơkŭm po tung phiu ro, kuăn pơlê pơkuâ dêi hnoăng cheăng, tơdâng tơ’mô, tro tiô luât, tơniăn, kơdĭng, châ tơƀrê lĕm, cho hâi leh kân dêi tâi tâng kuăn pơlê ƀă 99,6% tâi tâng kơxô̆ liăn pơlê lăm tâ phĭu.  

Pôa Bùi Văn Cường – Kăn xiâm chêh tôm xo rơkong Kuô̆k hô̆i, Kăn pơkuâ Ƀơrô Hô̆i đong tâ phĭu Tơnêi têa tối ăm ‘nâi, roh tâ phĭu hiăng rah tŭm 500 ngế kăn teăng mâ Kuô̆k hô̆i. Laga, tơdroăng séa ngăn mơnhên hiâm mơno dêi mơngế châ rah xo, Hô̆i đong tâ phĭu Tơnêi têa a roh hôp má 6 pơkâ ôh tá mơnhên hiâm mơno mâu kăn teăng mâ xua ôh tá tơniăn tiô pơkâ ƀă 1 ngế, a tíu tâ phĭu kơxô̆ 1 a Bình Dương.

          A Sa Ly tơplôu ƀă tơbleăng