VOV4.Sêdang - Hô̆i đong Tâ phĭu tơnêi têa hiăng pơkâ tơbleăng inâi 868 ngế ki tơbriât cheăng tung Kuô̆k hô̆i hneăng má 15 a 184 to tíu tâ phĭu tung lâp tơnêi vâ pôk xo 500 ngế kăn Kuô̆k hô̆i. Pôa Bùi Văn Cường, ngế ki chêh tôm xo rơkong, kăn pơkuâ Ƀơrô cheăng Kuô̆k hô̆i, kăn ƀơrô Hô̆i đong tâ phĭu tơnêi têa ăm ‘nâi: Tung tâi tâng inâi 868 ngế ki tơbriât cheăng tung Kuô̆k hô̆i hneăng má 15 tiô rêm kơ mâu tíu tâ phĭu, kơxô̆ ngế ki tơbriât xua Tơnêi têa tơbleăng ai 203 ngế; kong pơlê ai 665 ngế.

‘Na tơdroăng pơkâ tơdjuôm dêi lâp tơnêi têa, ngế ki tơbriât cho kơdrâi ai 393 ngế; ngế ki tơbriât cho hdroâng kuăn ngo ai 185 ngế; ngế ki tơbriât cho ôh tá ối tung Đảng ai 74 ngế. Ngế ki tơbriât cho kăn Kuô̆k hô̆i hneăng má 14 ai 205 ngế; ngế tơbriât cho hơnăm ối nếo (pá xôp 40 hơnăm) ai 224 ngế. Hơnăm ki tơbriât cheăng pro kăn Kuô̆k hô̆i ai 46 hơnăm.

Katarina Nga tơplôu ƀă tơbleăng