VOV4.Sêdang - Hâi lơ 10/6, Ƀơrô Kuô̆k hô̆i tơkŭm hôp khu chêh tơbleăng, tơbleăng Pơkâ dêi Hô̆i đong Tâ phĭu tơnêi têa ‘na inâi mâu ngế châ rah xo pro kăn Kuô̆k hô̆i hneăng 15. Pôa Bùi Văn Cường, Ngế chêh tôm xo rơkong dêi Kuô̆k hô̆i, Kăn Ƀơrô Hô̆i đong tâ phĭu Tơnêi têa ăm ‘nâi,  hâi tâ phĭu lơ 23/5 kố nah, ai lối 69 rơtuh ngế kuăn pơlê tung lâp tơnêi têa lăm tâ phĭu rah xo kăn Kuô̆k hô̆i hneăng 15 ƀă kăn hnê ngăn Hô̆i đong rêm râ  hneăng 2021-2026.

Kố cho hneăng tâ phĭu ki kân má môi riân sap ing nah ta troh nôkố, mơhé po tung pơla dế ai pơreăng Covid-19 tâ tú rĕng. Kơxô̆ kuăn pơlê lăm tâ phĭu 99,60% mơhno ki rơkê plĕng ‘na kal kí, ki pâ tơnêi têa ƀă tơdroăng tuăn loi dêi kuăn pơlê ƀă Đảng, Tơnêi têa. Klêi tâ phĭu ăm hlo, kuăn pơlê hiăng tâ tŭm tâi kơxô̆ mâu kăn Kuô̆k hô̆i tro tiô luât pơkâ; rah xo  99,87% ngế kăn Hô̆i đong râ kong pơlê; 99,81% kơxô̆ mâu kăn Hô̆i đong râ tơring ƀă 98,91% kơxô̆ mâu kăn Hô̆i đong rêm râ cheăm tâng vâ pơchông ƀă kơxô̆ tâ tro tiô pơkâ.

Gương tơplôu ƀă tơbleăng