VOV4.Sêdang - Kơxê lơ 7/5, a Khu pơkuâ ngăn Đảng ủy kong pơlê Dak Lak, jâ Trương Thị Mai, Ngế cheăng tung tíu xiâm kal kí, kăn pơkuâ ngăn tíu xiâm Đảng, kăn xiâm tơkŭm po tơnêi têa hiăng pơkuâ po rôh hôp tơbleăng pơkâ dêi Khu xiâm pơkuâ tơdroăng kal kí ‘na hnoăng cheăng kăn ƀô̆.

Jâ Trương Thị Mai diâp hnoăng cheăng, ăm reăng rơkâu kăn pơkuâ hnê ngăn Đảng Dak Lak ki nếo cho pôa Nguyễn Đình Trung

A rôh hôp, pôa Nguyễn Thanh Bình, Ngế cheăng tung tíu xiâm Đảng, kăn phŏ pơkuâ khu tơkŭm po Tíu xiâm Đảng hiăng tơbleăng pơkâ kơxô̆ 84/2021 dêi Khu xiâm pơkuâ tơdroăng kal kí ‘na pơtroh, xing xoăng cheăng kơ pôa Nguyễn Đình Trung, ngế cheăng tung tíu xiâm Đảng, kăn phŏ pơkuâ ngăn Đảng ủy kong pơlê, kăn hnê ngăn Vi ƀan kong pơlê Dak Nông pơtê pro kăn phŏ pơkuâ ngăn Đảng ủy kong pơlê, kăn hnê ngăn Vi ƀan kong pơlê Dak Nông vâ hơ’leh mot cheăng tung Khu pơkuâ cheăng ƀă pro kăn pơkuâ ngăn Đảng ủy kong pơlê Dak Lak hơnăm 2020 – 2025.

Pôa Nguyễn Đình Trung, Ngế cheăng tung tíu xiâm Đảng, kăn pơkuâ ngăn Đảng Dak Lak tơpui drêng xo pêi hnoăng cheăng

Tơpui a rôh po hneăng hôp pơcháu hnoăng cheăng mê, jâ Trương Thị Mai ăm ‘nâi, pôa Nguyễn Đình Trung cho kăn ƀô̆ pơkuâ hơnăm ối nếo châ hnê, hriâm pât ing hên tíu pêi cheăng ki phá tơ-ê dêi pó, luâ 24 hơnăm pêi cheăng a kong pơlê kơpong Tây Nguyên. Xua mê, ƀă hnoăng cheăng ki nếo, pôa Nguyễn Đình Trung kô pơtối mơdêk hnoăng cheăng, ivá dêi tơná vâ veăng kum mơjiâng kong pơlê Dak Lak mơnhông mơdêk rĕng, krá tơniăn ton.

Katarina Nga tơplôu ƀă tơbleăng