VOV4.Sêdang - A Hngêi Kuô̆k hô̆i nếo tơkŭm po roh hôp má 4 Hôi đong tâ phĭu rah xo kăn xiâm tơnêi têa. Troh nôkố, Hô̆i đong tâ phĭu rah xo kăn tơnêi têa hiăng tơdah châ 1.136 hô sơ ngế tơbriât to pro kăn teăng mâ Kuô̆k hô̆i hneăng má 15 ƀă 7.495 hô sơ dêi ngế tơbriât to pro kăn Hô̆i đong kuăn pơlê râ kong pơlê.

Vi ƀan Măt trâ̆n Tơnêi têa mâu râ hiăng pêi kêi đeăng tơdroăng tơkŭm po Hneăng hôp tơpui rah xo kăn roh má 2 vâ chêh inâi apoăng mâu kăn ki tơbriât to pro kăn teăng mâ Kuô̆k hô̆i ƀă mâu kăn tơbriât to pro kăn teăng mâ Hô̆i đong kuăn pơlê mâu râ.

Xông tơpui mơgêi roh hôp, jâ Nguyễn Thị Kim Ngân, Kăn xiâm hnê ngăn Kuô̆k hô̆i, Kăn xiâm hnê ngăn Hô̆i đong tâ phĭu rah xo kăn tơnêi têa tối ăm ‘nâi, Roh hôp má 4 Hô̆i đong tâ phĭu rah xo kăn tơnêi têa hiăng pêi kêi đeăng mâu tơdroăng xiâm pơkâ mơ’no.

Tơdroăng hbrâ rơnáu tâ phĭu troh nôkố tung lâp tơnêi têa hiăng ƀă dế châ pêi pro tro luât ƀă rak tơniăn tiô pơkâ mơ’no, tá hâi ai tơdroăng ki lâi tơdjâk troh roh tâ phĭu. Kăn xiâm hnê ngăn Kuô̆k hô̆i pơkâ thế thăm pơtâng tối tơ’nôm, hên tâ, châ tơbrê tâ ăm roh hneăng hôp tơpui rah xo mâu kăn roh má pái ƀă troh a hâi tâ phĭu rah xo kăn lơ 23/5 la ngiâ.

Sa Ly tơplôu ƀă tơbleăng