VOV4.Sêdang - Việt Nam dế tơbleăng pâk vaccine hbrâ mơdât COVID-19 a mâu kong pơlê, pơlê kong kân tâ pơreăng ƀă tơnêi tâ tú hên. Tung la ngiâ, vaccine kô châ xing xoăng troh tâi tâng mâu kong pơlê tung lâp tơnêi têa. Vâ hlê nhên ‘na vaccine hbrâ mơdât pơreăng COVID-19, châ tơ-ƀrê xúa, kơlo ki tơniăn xuân môi tiah mâu tơdroăng tơtrŏng drêng pâk pơkeăng, Khu rah chêh tơdroăng mê hiăng tơpui tơno tơ’nôm ƀă mâu ƀok thái pơkeăng Trịnh Quang Trí, Ngế pơkuâ Tíu xiâm seá ngăn ƀă mơdât pơreăng kong pơlê Dak Lak. 

-Ô ƀok thái pơkeăng, pâ ƀok thái pơkeăng ăm ‘nâi nhên tơdroăng ‘na vaccine hbrâ mơdât COVID-19 dế châ tơbleăng pâk a Việt Nam?

Ƀok thái pơkeăng Trịnh Quang Trí: Nôkố, hên mơngế kal vâ pâk vaccine COVID-19 la pơkeăng oh tá bê tŭm xua mê bú tơbleăng pâk a mâu ngế ki tơ’lêi tâ tú. Vaccine hbrâ mơdât COVID-19 ki dế xúa pâk nôkố cho dêi khu pro pơkeăng AstraZeneca xúa kong têa Ănglê mơjiâng pro, chiâng pâk a tâi tâng mâu ngế sap ing 18 hơnăm troh 65 hơnăm, ki ôh tá ai tơdroăng châi môi tiah tơngê, mâu tơdroăng châi ki ê ‘na plâi nuih, ‘na kơtêi ƀă hía hế.

-Mâu tơdroăng ki tâ hmâ trâm klêi pâk ƀă thế tơtrŏng mâu tơdroăng klâi drêng pâk pơkeăng vaccine COVID-19, ô ƀok thái pơkeăng?

Ƀok thái pơkeăng Trịnh Quang Trí: Xuân môi tiah mâu túa pơkeăng vaccine ki ê, vaccine hbrâ mơdât pơreăng COVID-19  drêng châ pâk a châ ai ngê ki ‘nâ kô tâ châi a tíu pâk, ‘nâ hía châi ko, tơngê iâ, rơlâi rơlo tung châ, châi tung klêa ƀă hên ki ê. Mâu tơdroăng pro châi ki ê la châi ó klêi pâk nôkố hâi hlo tơbleăng tối nhên ‘na mâu ki ti mê.

Laga, tung lâp plâi tơnêi hiăng xúa lối 500 rơtuh klŏng pơkeăng vaccine mơdât COVID-19 dêi mâu khu pro pơkeăng ki ê pơrá phá dêi rơpó la vâ tối mâu túa pơkeăng mê tơniăn ôh tá tro klâi.

Tơtrŏng drêng pâk vaccine COVID-19 thế pâk kơtăn pơla rôh pâk pơkeăng vaccine ki ê ki iâ gá thế 2 măng tĭng. Vaccine châ pâk a hơ’nêh, rêm hdrôh pâk ai 0,5ml ƀă pâk 2 rôh, rêm rôh kơtăn dêi rơpó 12 măng tĭng. Pâk tŭm 2 hdrôh mê kô tơ-ƀrê kring vế klêi pâk dâng 70- 80%. Phá tâ pâk pơkeăng vaccine ki ê, pâk vaccine COVID-19 bú xúa pâk a mâu hngêi pơkeăng, rêm hdrôh pâk ki hên gá dâng 50 ngế. Hdrối pâk, ngế ki pâk kô châ kăn ƀô̆ ngăn pơkeăng hnê tối, khăm rah ngăn, châ ăm phêp ‘nôi klêi mê nếo pâk. 

Klêi pâk kô châ séa ngăn a hngêi pơkeăng tung pơla 30 phut ƀă klêi mê kô séa ngăn dêi ivá a hngêi sap ing 24 chôu ta troh 48 chôu. Mâu hngêi pơkeăng pơkât kô pơtối hmâng hbrâ rơnáu kơxô̆ phôn krếo tơdrêng vâ teăm ‘nâi tiâ mơnhên mâu mâu ki pâk tâng lơ ai tơdroăng tâ tơviah, tơdroăng châi ki ê klêi pâk pơkeăng vaccine COVID-19.

-Tơdroăng pơkâ pâk vaccine hbrâ mơdât COVID-19 a Dak Lak môi tiah lâi ô ƀok thái pơkeăng? Ƀă pin hôm ai trâm pá tơdroăng klâi há tung pơla tơbleăng pâk?

Ƀok thái pơkeăng Trịnh Quang Trí: Tiô tối hdrối a mơ’nui khế 4 kô tơbleăng pâk tung lâp kong pơlê. Drêng ai vaccine kô tơbleăng pâk ăm mâu ngế ki tiô Pơkâ 21 dêi Chin phuh mê cho mâu ngế pêi tơdroăng cheăng a mâu hngêi pơkeăng cheăm, kăn ƀô̆ ngăn pơkeăng pêi tơdroăng hbrâ mơdât pơreăng, mâu ngế lăm tăng mâu ki tâ pơreăng, ngăn ‘na pơreăng tâ tú khu kơxô̆ 1.

Klêi mê cho kŏng an, mâu lêng; thái cô, mâu ngế ki pêi tơdroăng cheăng a tíu krâm mơngế... Drêng ai tŭm vaccine kô pâk ăm mâu ngế tiô pơkâ pâk hdrối.

Ki xơpá ki trâm tung tơdroăng tơbleăng pâk vaccine hbrâ mơdât COVID-19 cho tơdroăng rak tung kơtuh hngíu vâ tơniăn. Hên pơkeăng vaccine thế ‘măn rak a tíu ki hngíu ó nôkố dế xúa a kơlo 28 đô̆ C.

Khu xiâm ngăn ‘na hbrâ mơdât pơreăng hiăng mơjiâng pơkâ ƀă hbrâ mâu tơmeăm ki vâ ‘măn hngiú tơniăn ăm tơdroăng tơbleăng pâk vaccine mơdât COVID-19.

-Mơnê kơ ƀok thái pơkeăng!

Hnê tối tơdroăng pêi pro 5k dêi Khu xiâm ngăn pơkeăng pơlât

KÊN PÂNG MÔH: Thế truâ kên pâng môh rơkong rêm hâi drêng prôk drô troăng, a tíu tơkŭm pú hên; truâ kên pâng môh rơkong a mâu hngêi pơkeăng, kơpong krâ krê.

KƠDÊ PƠREĂNG: Xếo kŏng rêm hâi ƀă kơƀŏng lơ ƀă têa pơkeăng kơdê pơreăng a kŏng. Xếo krúa ‘na ngiâ tơmeăm xúa tơmeăm pê rêm hâi ki pêi ƀă kŏng (kŏng kuâ a péa, phôn râng kŏng, kơmăi tính, kơƀăng tăng ƀă hên ki ê). Đi đo mơgrúa krúa hngêi trăng ăm bâ phuâng.  

KI KƠTĂN: Thế ối kơtăn hơngế drêng tơpui ƀă mâu ki ê.

ÔH TƠKŬM: Ôh tơkŭm pú hên

TỐI TƠBLEĂNG ĂM KHU NGĂN PƠKEĂNG:  Tối tơbleăng tơná ăm mâu ngăn pơkeăng tung App NCOVI; cài ứng dụng BblueZone a tíu   https://www.bluezone.gov.vn vâ châ tơbleăng hdrối drêng nhôm tơ’lêi tâ tú pơreăng COVID-19.

Tâng tâ tơngê, kơ-o, pá kâi hiâm thế krếo phôn ăm kơxô̆ phôn krếo tơdrêng dêi khu xiâm ngăn pơkeăng pơlât 19009095, tâng ôh troăng kơxái phôn ki rĕng dêi hngêi pơkeăng kong pơlê vâ châ hnê tối, kơjo kum, hnê lăm khăm pơlât vâ châ tơniăn.

Thế rak tơniăn ívá ăm tơná ƀă pin hlo ai hên pơreăng COVID-19.

Gương tơplôu ƀă tơbleăng