VOV4.Sêdang - Nếo achê pơla kố nah, xông tơpui a roh trâm mâ, pêi cheăng ƀă 70 ngế hriăn cheăng ‘na khoa hok; mâu yăo sư, ƀok thái pơkeăng; khu kăn pơkuâ kơvâ cheăng khăm pơlât, tơdroăng mơjiâng pro pơkeăng, mê pôa Phạm Minh Chính, Ngế pro xiâm hnê ngăn tơnêi têa hiăng tối nhên: tơdroăng veăng kum ki kal tung kơvâ pơkeăng ƀă khăm pơlât tung rak vế ngăn ivá châ chăn dêi kuăn pơlê, mê Đảng, Tơnêi têa, kuăn pơlê hiăng mơnê kân kô khu ngế ki hriăn cheăng ‘na khoa hok, khu ngăn ‘na pơkeăng ƀă khăm pơlât tiô kơ rêm rơxông, malối tung pơla dế ai tâ tú pơreăng COVID-19.

Rôh apoăng trâm mâ, Ngế pro xiâm hnê ngăn tơnêi têa tối mơnê hlối púi vâ tơmâng xo tơdroăng hnê khê̆n ‘mâi hơ’lêh tơtro. Ai drêng lâi luâ tâ mê nếo, Ngế pro xiâm hnê ngăn tơnêi têa púi vâ mâu thái, mâu cô, mâu khu cheăng ‘na khoa hok ki rơkê tung tơdroăng tơplâ mơdât pơreăng tí tăng hriê̆n plĕng, pêi pro mâu túa pơkeăng, vaccine hbrâ mơdât COVID-19, ing mê pin vâ môi tuăn ai pơkâ troăng rơhlâ tơtro vâ troh tah COVID-19. Ngế pro xiâm hnê ngăn tơnêi têa púi vâ mâu khu cheăng ‘na khoa hok mơdoh hâi khế, chôu mơ-eăm ‘no hên hnoăng tơná veăng hnê tối.

A rôh hôp, hên khu cheăng khoa hok veăng hnê tối ƀă tối tâ rơ-rêk tung hiâm mơno hlo ai hên ngế rơhêng vâ ‘nâi plê̆ng, veăng hnê tối dêi Đảng, Tơnêi têa ƀă kuăn pơlê; tối đi đo mơ-eăm pleăng hnoăng tơná ăm tơdroăng cheăng pêi ‘na pro pơkeăng dêi tơnêi têa, malối tung pơla dế ai pơreăng COVID-19 nôkố, hên khu cheăng khoa hok dế ai mâu hnoăng veăng ‘no tung tơdroăng pêi pro hbrâ mơdât pơreăng.

Mâu khu cheăng khoa hok tối tơbleăng ăm Ngế pro xiâm hnê ngăn Chin phuh, hiăngai mâu tơdroăng mơ-eăm, hriê̆n plĕng tung mơnhông mơdêk tơ-ƀrê tơdroăng khăm ngăn, rah klâ phá mâu F0, F1, kring vế kơpong ki ngiât hâi ai pơreăng ƀă pơlât mâu ngế F0 ƀă tơbleăng mâu tơdroăng tối, pâ thế vâ mơdêk tơ-brê tơdroăng plâ mơdât pơreăng.

Yăo sư tie#n sih Nguyễn Thanh Bình, Kăn xiâm hnê ngăn Hô̆i đong hngêi trung Đại hok Dược Hà Nội tối tiah kố thế pêi pro kơtăng vâ mâu tơdroăng pơkâ ki chin phuh hiăng tơbleăng.

“ ‘Na troăng hơlâ ki pin hiăng pêi pro ung hnê mơhno dêi Chin phuh, Khu xiâm ngăn pơkeăng pơlât ngin tối tiah kố tro ‘nâng ƀă tro khât, pin hiăng tơkŭm a tơdroăng hbrâ mơdât ƀă pơlât; hbrâ mơdât pin ai klâ ối kơtăn, 5k, pin hiăng pêi pro. Pin hiăng ai vaccine xuân hiăng tối tơbleăng; pơlât pin hiăng ai pơkeăng” .

Phŏ Yăo sư Tiê̆n sih Lê Văn Truyền, Kăn hnê ngăn Hô̆i đong hnê tối ăm hlá mơ-éa chêh inâu rak ‘măn tê pơkeăng, tơmeăm ki pro pơkeăng mê tối tiah kố, pin thế mơhnhôk tăng hên mâu kŏng ti pro pơkeăng tung tơnêi têa tơkŭm pro pơkeăng pơlât COVID-19.

“Pin thế mơhnhôk tăng mâu hngêi kơmăi pro pơkeăng tung tơnêi têa pin ai vâ chê 300 to hngêi kơmăi, mơ-eăm tăng xiâm tơmeăm vâ pro pơkeăng pơlât COVID ki hiăng châ lâp plâi tơnêi mơnhên”.

Tối tơbleăng mơgêi hneăng hôp, pôa Phạm Minh Chính, Ngế pro xiâm hnê ngăn tơnêi têa tối nhên 2 tơdroăng cho veăng ‘no hnoăng dêi mâu khu cheăng khoa hok kơvâ ngăn pơkeăng ƀă tơdroăng pêi cheăng kring vế, rak ngăn ivá kuăn pơlê ƀă hnoăng veăng ‘no dêi khu cheăng khoa hok kơvâ ngăn pơkeăng ƀă tơdroăng kring vế, rak ngăn ivá kuăn pơlê ƀă veăng ‘no hnoăng mâu ngế hbrâ mơdât pơreăng COVID-19 a tơnêi têa pin. Ngế pro xiâm hnê ngăn tơnêi têa tối tiah kố ƀă tơdroăng veăng ‘no hnoăng kân kĭn dêi kơvâ ngăn pơkeăng ƀă tơdroăng cheăng hbrâ mơdât pơreăng COVID-19 a tơnêi têa pin tung vâ chê 2 hơnăm hdrối.

Ngế pro xiâm hnê ngăn tơnêi têa ăm ‘nâi, ngế ki xiâm ki pin vâ tah, vâ kâiƀlêi trâng pơreăng kô chiâng tối 3 tơdroăng ki xiâm: Tơdroăng mơ-eăm dêi tâi tâng tơdroăng kal kí; ki môi tuăn dêi kuăn pơlê; Xúa mâu tơdroăng cheăng ‘na khoa hok plâ mơdât pơreăng, hbrâ mơdât ƀă tơdroăng pâk vaccine ƀă mâu tơdroăng pơlât tơdrêng ƀă pơkeăng. Kơvâ ngăn pơkeăng cho xiâm ki kal tung tơdroăng hbrâ mơdât tro tiô khoa hok, veăng ‘no hnoăng tí tăng ngăn, pêi pro vaccine ƀă pơkeăng pơlât ƀă hlối veăng ‘no hnoăng ‘na pơlât.

Ngế pro xiâm hnê ngăn tơnêi têa tối nhên, vâ ƀlêi trâng kâi châ mơdât tâ tú dêi pơreăng COVID-19 tối krê ƀă pơreăng tối tơchoâm, Chin phuh kal thế mơ-eăm, ing tơdroăng kơdo mơ-eăm tâ nếo dêi mâu ki rơkê, khu cheăng khoa hok vâ mơnhông mơdêk ‘na pro pơkeăng dêi Việt Nam mơnhông tơ-ƀrê tâ nếo.

Tung mê, thế tối nhên tơdroăng cheăng ‘na pro pơkeăng dêi pin cho xiâm ing y hok khoa hok, hdroâng mơngế, tâi tâng rêm ngế, xua vâ pơlât kuăn pơlê; ‘na hbrâ mơdât pơreăng cho xiâm, ngăn khăm pơlât a râ cheăm cho xiâm, ‘na tí tăng ‘nâi plĕng trâu tâ ăm tơdâng ƀă tơdroăng khăm pơlât kuăn pơlê; rơtế ƀă tơdroăng pơlât ƀă ôu pơkeăng nhâ loăng ƀă pơlât tiô túa nếo nôkó, thái pơkeăng lêng tơrŭm ƀă thái pơkeăng kuăn pơlê, khăm pơlât tung tơnêi têa rơtế ƀă khăm pơlât ƀă kong têa ê. Ƀă mâu khu cheăng khoa hok, Ngế pro xiâm hnê ngăn tơnêi têa pâ thế:

“Hlo oh tá ai hên vaccine ƀa pơkeăng pơlât COVID-19 nôkố mê ai pâ thế mâu khu cheăng khoa hok, mâu ngế rơkê mơ-eăm tơrŭmƀă mâu ngế cheăng ‘na khoa hok, mâu khu tơrŭm cheăng ‘na khoa hok tung lâp plâi tơnêi vâ tí tăng xiâm kế ki vâ mơjiâng pro vaccine, pơkeăng pơlât COVID-19 ăm Việt Nam ƀă hnê khăm pơlât COVID-19 ăm kuăn pơlê ing mâu tơdroăng hnê tung măng internet, hla tơbeăng, rơ’jiu, um tơvi”.

Malối tung tơdroăng hnê tối Ngế pro xiâm hnê ngăn tơnêi têa pâ thế, mâu ngế rơkê, khu cheăng khoa hok kal thế veăng kum kuăn pơlê vâ tơdroăng hnê tối mê nhên, tro tiô khoa hok ‘na mâu tơdroăng tung hbrâ mơdât pơreăng.

“Mâu ngế ki rơkê, mâu khu cheăng khoa hok pơtối rak vế tâ nếo hnoăng cheăng ƀă ki nhoăm loi tơná tung mơ-eăm kum kuăn pơlê ing tơdroăng hnê tối vâ tơbleăng troh lâp lu, tối nhên ăm kuăn pơlê hlê ‘nâi drêng tơmiât troh ‘na khoa hok ai mâu troăng rơhlâ hbrâ mơdât pơreăng, ki mê ôh tá ngế ki lâi tơpui rơkê môi tiah mâu thái cô. A púi vâ mâu tháicô pro ti lâi ăm kuăn pơlê ‘nâi. Má péa, pro ti lâi ăm kuăn pơlê hlê, má pái pro ti lâi ăm kuăn pơlê loi. Má pŭn, pro ti lâi ăm kuăn pơlê veăng môi tuăn, má pơtăm pro ti lâi vâ kuăn pơlê rơtế veăng pêi pro. Pơtăm tơdroăng mê pâ thế mâu thái cô rơtế ƀă dêi rơpó hiăng pêi pro hdrối, lơ dế pro, púi vâ mâu thái cô pro pêi pro hên tâ rơdêi tâ nếo khât tâ nếo’’.

Ngế pro xiâm hnê ngăn tơnêi têa púi vâ rêm ngế, khu pú hên mâu ngế rơkê, khu cheăng khoa hok tung kơvâ ngăn pơkeăng tung tơnêi têa ƀă kong têa ê, pơtối rak vế tơdroăng hbrâ pêi pro sap ing nah ƀă túa hmâ pêi pro, ki mơ-eăm, hnoăng cheăng pêi pơtối rơtế ‘no ivá, môi tuăn, ƀă mâu tơdroăng pêi pro kơtăng, ai pơxúa, tơ-brê, mơ-eăm rơtế ƀă tơnêi têa kâi blêi trâm tơplâ mơdât pơreăng COVID-19, kring vế ivá ăm kuăn pơlê, rĕng djâ tơdroăng rêh ối môi tiah hmâ ƀă ‘mâi mơnhông cheăng châ rêh ối châ tơ-ƀrê.

VOV1

Gương tơplôu ƀă tơbleăng