Tiô tối tơbleăng, thăm mơnhông tâk cheăng kâ tung 6 khế apoăng hơnăm dêi kong pơlê Dak Lak tiô riân châ 7,8%, iâ tâ tơdroăng chêh tối lối 9%. Tung 12 tơdroăng pơkâ pêi ki kal, ai 5 tơdroăng pơkâ pêi châ ƀă luâ túa pơcháu, 1 tơdroăng pơkâ pêi châ, 6 tơdroăng pơkâ pêi tá hâi châ. Cheăng mơhnhôk tơlo mâu kơxô̆ liăn, ‘no hrê liăn ngân pêi cheăng tơdjuôm, xo tơnêi ƀă tơdroăng cheăng kâ, tê mơdró dêi khu mơdró kâ a Dak Lak dế trâm hên xơpá.

A hneăng hôp, Hô̆i đong hnê ngăn kong pơlê Dak Lak kô séa ngăn 30 hlá mơ-éa tơbleăng, 20 kơtâ mơ-éa pơkâ ki ai tơdjâk troh mâu kơvâ liăn ngân, ‘no liăn cheăng tơdjuôm, pơhlêh xúa kong ngê̆, hnê hriâm, khăm pơlât, cheăng lêng gâk kring, hbrâ ví ƀă kong mê khía mơhot têa kân lân lu ƀă xúa túa pêi cheăng kăn pơkuâ kong pơlê péa râ. Tơdroăng ki êng ƀă tiâ mơnhên xuân châ tơkŭm tung tơdroăng pêi pro mâu tơdroăng tơkêa, ‘no liăn pêi cheăng tơdjuôm, tơleăng pơsăm tối dêi kuăn pơlê ƀă lêi tah mâu tíu kreăng tung pơkuâ ngăn, tơdjâ.