Kong pơlê Dak Lak mơdêk rĕng pro Tơdroăng tơkêa bro troăng kân kĭng têa kơxĭ. Troh nôkố, tơdroăng tơkêa bro hiăng pơcháu lối 90% ki pro. La hâi “mơhnhôk pro ôh tá pơtê 45 hâi măng” ôh tá ối hên, kong pơlê pơkâ thế mâu cheăm bêng, kong pơlê, kơvâ cheăng thâ tăng mâu tíu pro pá, thế tơniăn pôi ta tơdjâk tơdroăng mơjiâng pro. Tơdroăng tơkêa bro troăng prôk kĭng têa kơxĭ kong pơlê Dak Lak xŏn lối 25km, tâi tâng kơlo ‘no pro 3.800 rơtal liăn, kal xo tơvêh 120 ha tơnêi dêi lối 1.500 rơpŏng kuăn pơlê.

Troh nôkố, mâu cheăm bêng tung kong pơlê hiăng pơcháu lối 21km, tơ’mô dâng 114ha, châ lối 90% tơnêi kal xo tơvêh. Séa ngăn ‘na mơjiâng pro hâi lơ 17/8, jâ Hồ Thị Nguyên Thảo, Phŏ Kăn hnê ngăn Vi ƀan kong pơlê Dak Lak pơkâ thế mâu tíu pêi cheăng, kơvâ cheăng ƀă cheăm bêng kong pơlê thâ rĕng pro klêi tơdroăng pơcháu; tơmâng tah mâu tíu ối tơvâ tơvân, mơdêk tơrŭm, ôh tá ăm ai tơdroăng tơpôu dêi rơpó hnoăng cheăng pêi ah pêi lơ hrá klêi.