Pơla hơnăm 2026-2030, péa pâ hiăng môi tuăn thăm mơnhông tơrŭm cheăng tung mâu kơvâ cheăng tê mơdró, ‘no liăn cheăng, pêi chiâk, ôm hyô, hnê hriâm - hnê cheăng pêi, hnê mâu ngế cheăng, túa lĕm tro - rêh ối pơlê pơla ƀă gâk kring. Tung mê, péa to kong pơlê thăm mơdêk tơdjêp khu mơdró kâ, pơkâ mơdêk tê mơdró, ‘no liăn cheăng, tối ăm dêi rơpó mâu tơdroăng ki rơkê plĕng tung pêt mơjiâng, uâ pơliê tơmeăm pêi lo ing chiâk deăng ƀă mơjiâng pro mâu kế tơmeăm ôm hyô tơdjuôm.

Dak Lak prếi Champasak mơ-eăm ăm ki kơnía ‘na tê mơdró – pơla péa pâ tâk 15-20% rêm hơnăm ƀă thăm mơdêk mơjiâng sap ing 5-15 tơdroăng tơkêa ‘no liăn cheăng tung pơla 5 hơnăm. Pôa Nguyễn Thiên Văn, Phŏ kăn hnê ngăn Vi ƀan kong pơlê Dak Lak, tối tiah kố po rơdâ tơrŭm cheăng kâ kô pro tơ’nôm ivá ăm tơrŭm cheăng pơla péa to kong pơlê.