Dak Lak rah xo tơ’nôm lối 2.700 ngế hok tro mot hriâm lâm 10 dêi tơnêi têa
Thứ ba, 05:00, 14/07/2026
Tơplôu: Katarina Nga/VOV Tây Nguyên
Tơplôu: Katarina Nga/VOV Tây Nguyên
VOV.Xơ Đăng - Khu ngăn Hnê hriâm ƀă Hnê mơjiâng tuăn ngoâ rơkê kong pơlê Dak Lak nếo pơkâ rah xo tơ’nôm lối 2.700 ngế hok tro mot hriâm lâm 10 mâu hngêi trung râ má pái phôh thong dêi tơnêi têa hơnăm hriâm 2026 – 2027.
Rôh rah xo tơ’nôm hok tro mot hriâm rôh má péa, tâi tâng kơxô̆ ngế châ rah xo tơ’nôm tung lâp kong pơlê châ lối 3.300 ngế hok tro. Ƀă mâu ngế ki chêh inâi la tá hâi ‘nâi vâ hriâm hngêi trung ki lâi. Tung pơla chêh inâi tơdroăng tơná vâ hriâm cho sap ing hâi lơ 12/7 troh 17 chôu lơ 14/7/2026, rêm ngế hok tro chêh inâi hên cho péa tơdroăng púi vâ hiâm rôh má 1 ƀă rôh má 2 kô châ tơbleăng a hâi lơ 15 ƀă 17/7.
Klêi kơ’nâi hok tro chêh pro klêi hlá mơ-éa mot hriâm, kơvâ ngăn Hnê hriâm ƀă Hnê mơjiâng tuăn ngoâ rơkê kong pơlê Dak Lak kô tơbleăng điêm chuẩn ki păng ‘nâng vâ pro klêi tơdroăng cheăng rah xo hok tro.
Viết bình luận