Hôp hdró rôh pơxiâm mơnhông tơƀrê nếo dêi kong pơlê Dak Lak klêi tơ‘mot, hlối po troăng mơnhông tơƀrê hnoăng pro mâu tơdroăng cheăng vâ pêi ton hơnăm, pro xiâm ki tơ’mot mâu khu ‘no liăn mơjiâng tơmeăm khoăng. Tung pơkâ ki nếo, Dak Lak pơkâ chiâng  tơdroăng cheăng pêi tâk dêi kơpong kĭng têa kơxĭ ‘na Hdroh Tơdế Tơnêi têa ƀă Tây Nguyên, mơnhông tơƀrê tiô troăng pêi cheăng lĕm krúa tiô túa ƀă krá ton.

Khoa hok Kŏng ngê̆, hơ‘lêh nếo, pơ’lêh kơxô̆ pêi cheăng tung măng ƀă cheăng kâ têa kơxĭ châ kong pơlê Dak Lak tối cho xiâm ki mơ-eăm pêi cheăng châ tâk nếo. Tơdroăng mơnhông tơƀrê nếo châ tơkŭm pêi tiô túa 3 kơpong mơnhông tơƀrê, 3 hang lơng cheăng kâ ƀă 2 tíu xiâm mơnhông pêi cheăng. Tung mê, kơpong Buôn Ma Thuột pơtối rak hnoăng ki xiâm pêi cheăng châ tơƀrê dêi Tây Nguyên, ‘na kơpong peăng mâ hâi Lo châ hnê pêi tiô troăng kô tâk hên nếo ‘na tơdroăng cheăng ƀă kơmăi, logistics, kơno têa kơxĭ ƀă cheăng kâ a têa kơxĭ, mơnhông tơƀrê tiô troăng pêi cheăng krúa lĕm, pêi cheăng kâ hơ’lêh, pơ’lêh nếo hriăn plĕng ki nếo ƀă pêi cheăng tung măng.

Mơ-eăm pêi châ tâk GRDP riân rêm ngế pơla hơnăm 2026-2030 châ sap 11% /hơnăm tơngi klêng, troh hơnăm 2030 riân rêm ngế pêi lo châ kơpêng 153 rơtuh liăn.

A rôh hôp, pôa Đỗ Hữu Huy, Kăn hnê ngăn Vi ƀăn Kuăn pơlê kong pơlê Dak Lak tối:

“Ki xiâm tâk rĕng, krá tơniăn bú pêi châ la lâi tâi tâng khu cheăng kal kí rơtế veăng ƀă khu mơdró, khu ‘no liăn pêi cheăng pro tơmeăm khoăng. Tơdroăng ki mâu khu ‘no liăn mơjiâng pro tơngah ôh ti xê to a mâ ngăn mâu tơdroăng pêi pro vâ mơnhông tơƀrê mê ối cho môi khu kăn veăng pêi pro tro tơdrăng, pêi kơtăng hlối tơtế ƀă. Xua mê, tơdrêng ƀă pê klêi tơdroăng pơkâ hdró, ‘no liăn pro tơmeăm khoăng ƀă hbrâ mơjiâng khu tơnêi vâ pêi cheăng, Dak Lak ‘nâi nhên ‘mâi hơ’lêh pêi pro hlá mơ-éa, ‘mâi hơ’lêh ‘no liăn pêi cheăng tê mơdró cho tơdroăng cheăng pêi ki kal, vâ pêi tơƀrê; xo kuăn pơlê ƀă khu mơdró pro xiâm pêi cheăng”.

A rôh hôp, kong pơlê Dak Lak xuân tơbleăng inâi mâu tơdroăng tơ’mot khu ‘no liăn cheăng, tơkŭm a pêi chiâk xúa kơmăi dâi lĕm ƀă uâ pơliê trâu lĕm tâ mâu tơmeăm pê lo, kơmăi uâ pơliê pro tơmeăm -  pro ki kố ki mê, on tơhrik ‘mâi pro, logistics ƀă pro tơmeăm khoăng. Vi ƀan kuăn pơlê kong pơlê Dak Lak hiăng pơcháu hlá mơ-éa pơkâ dêi khu pơkuâ vâ môi tuăn troăng hơlâ ‘no liăn cheăng ăm 25 tơdroăng tơkêa bro, ƀă tâi tâng kơxô̆ liăn ‘no pêi lối 40.290 rơtal liăn. Kong pơlê xuân kĭ tung hlá mơ-éa chôu pâ tơrŭm cheăng ƀă 76 khu ‘no liăn pêi cheăng, ai tâi tâng kơxô̆ liăn chêh ‘no pêi apoăng lối 1 rơtuh rơtal liăn.