A hôp tơno tơdroăng kal, kong pơlê Dak Lak tơbleăng inâi mâu kơvâ ki kơjo mơhnhôk mơ’no liăn cheăng tơkŭm a pêi chiâk deăng xúa kŏng ngê̆ rơxông nếo ƀă uâ bro trâu hơngế, kơmăi kơmok uâ bro – mơjiâng, on tơhrik ki vêh pro, logistics ƀă hngêi trăng troăng klông.

Vi ƀan kong pơlê Dak Lak hiăng diâp pơkâ môi tuăn troăng hơlâ mơ’no liăn cheăng ăm 25 tơdroăng tơkêa bro, ƀă tâi tâng kơxô̆ liăn mơ’no lối 40.290 rơtal liăn. Kong pơlê xuân kĭ hlá mơ-éa chôu vế tơrŭm cheăng ƀă 78 khu mơ’no liăn cheăng, ai tâi tâng kơxô̆ liăn kĭ apoăng lối 1 rơtuh liăn. Xông tơpui hnê mơhno a hôp tơno tơdroăng kal, Đăi tươ̆ng Phan Văn Giang, Ngế xiâm Khu xiâm pơkuâ lêng tối rơdêi, tơdroăng tơbleăng pơkâ pêi ki kơnâ kal khât ƀă tơdroăng mơnhông mơdêk dêi kong pơlê Dak Lak tung hneăng nếo.

Chin phuh pói thế Dak Lak kô xúa lĕm mâu tơdroăng pơkâ ƀă tơ’lêi hlâu vâ mơjiâng ivá mơnhông mơdêk nếo, mơdêk pêi lo châ hên, dâi lĕm, ivá tơbriêt cheăng dêi cheăng kâ.