Ƀă tơdroăng pơxá “Dak Lak-Tơmeăm khoăng ai hlâu, púi châ xông tơbrê ”, hneăng Hôp Tơbleăng pơkâ hdró ƀă mơnhông ‘no liăn mơjiâng pro hơnăm 2026 tơ’mot dâng 1.000 ngế kăn xiâm dêi mâu khu xiâm, kơvâ cheăng Tíu xiâm, khu tơrŭm lâp plâi tơnêi, khu mơdró, grup pêi cheăng kâ ƀă khu ‘no liăn pro tơmeăm khoăng tung tơnêi têa ƀă kong têa ê.

Tíu vâ tối ki kal má môi dêi hneăng hôp cho tơbleăng Hlá mơ-éa pơkâ dêi Khu pơkuâ kĭ ‘Mâi rơnêu Pơkâ hdró kong pơlê Dak Lak pơla hơnăm 2021-2030, hnoăng vâ pêi troh hơnăm 2050. Hlá mơ-éa pơkâ hdró nếo châ tơngah kô po troăng mơnhông rơdâ kân tâ, ‘mâi mơnhông mâu kơpong pêi cheăng xiâm, hang lơng cheăng kâ ƀă mâu tíu xiâm mơnhông cheăng kâ nếo, pro xiâm vâ kong pơlê châ tơ’mot mâu khu ‘no liăn pêi cheăng pro tơmeăm khoăng tung hơnăm la ngiâ.

Pakĭng tơdroăng ki kal, Hneăng hôp ối po mâu tơdroăng pêi pro, mê cho: Pơxiâm pêi pro, leh hiăng klêi pro mâu tơmeăm khoăng, tơdroăng tơkêa bro ki tro; Hôp tơpui tơno ƀă khu mơdró, tơrŭm cheăng ƀă rơpŏng tê mơdró; Hneăng hôp tơpui ‘na Cheăng kâ krê kuăn pơlê Việt Nam - Rôh hôp tơpui tơno a Dak Lak; Hôp tơpui tơdroăng mơnhông cheăng ƀă kơmăi uâ pơliê lĕm tâ nếo ƀă logistics tung mâu kơpong: Hôp tơpui ‘na tơmeăm pêi lo ƀă kơmăi dêi thôn pơlê ki dâi lĕm, OCOP dêi kong pơlê ƀă mâu kong pơlê ki achê ƀă hía hé.

A rôh hôp, kong pơlê Dak Lak diâp Hlá mơ-éa pơkâ dêi khu pơkuâ vâ pêi tiô troăng hơlâ ‘no liăn cheăng, hlá mơ-éa mơnhên chêh inâi ‘no liăn cheăng ƀă kĭ mâu hlá mơ-éa chôu vế tơrŭm cheăng ăm chât tơdroăng tơkêa bro dêi hên kơvâ cheăng. Pôa Trần Công Sơn, Phŏ Ngế pơkuâ xiâm liăn ngăn kong pơlê Dak Lak ăm ‘nâi, tơdrêng ƀă tơdroăng tơ’mot ‘no liăn pêi cheăng tro tơdroăng, kong pơlê dế tơbleăng luât pơkâ “pro hlâu’’ vâ pro iâ hâi khế pro mâu hồ sơ ăm khu mơdró.

“Khu xiâm rak liăn ngân hiăng tăng ‘nâi plĕng ƀă Vi ƀan kuăn pơlê dêi kong pơlê mơjiâng troăng hơlâ pêi hlâu tiô troăng pôe kơdroh 50% hlá mơ-éa ki pro, ƀă ăm hlá mơ-éa pơkâ dêi khu pơkuâ hdrối nah ai 17 hâi chôu, ối pá dâng 8,5 hâi. Nôkố luât pơkâ “pro hlâu mê’’ hiăng châ kong pơlê tơbleăng, la ngiâ a tíu pêi cheăng tơkŭm mâu kơvâ cheăng tơdjâk troh tăng ‘nâi plĕng ăm Vi ƀan kong pơlê pro hlá mơ-éa tro tiô troăng pêi iâ hâi pro hlá mơ-éa ki tơdjâk troh tơdroăng tơkêa bro ‘no liăn pêi cheăng vâ tơniăn ăm mâu tơdroăng tơkêa bro rĕng châ pêi cheăng ƀă pơtối pêi tơƀrê”.

Ôh ti xê to tơkŭm tah mâu tíu xơpá ‘na pro hlá mơ-éa, kong pơlê Dak Lak xuân dế hbrâ ‘mâi pro tơdrêng mâu tơdroăng ‘na tơmeăm khoăng hngêi trăng troăng prôk, mơngế pêi cheăng ƀă pơ’lêh kơxô̆ cho pơ’lêh cheăng tung măng vâ tơdah xo mâu tơdroăng tơkêa bro ki nếo. Tiô Khu tơrŭm cheăng, ƀă chât tơdroăng tơkêa bro châ pơcháu pơkâ ‘no liăn pêi ƀă kĭ tơhrâ tơrŭm cheăng, kố châ ngăn cho môi tung mâu tơdroăng mơhnhôk ‘no liăn pêi cheăng ki hên má môi riân sap nah ta troh nôkố dêi kong pơlê.

Tung pơla mơnhông tơƀrê nếo dế po hên troăng rôh tơ’lêi hlâu vâ tơrŭm cheăng pơla mâu kơpong Tây Nguyên ƀă kĭng têa kơxĭ pa hdroh Tơdế tơnêi têa, rôh hôp drêng kố châ tơngah ôh ti xê to tơ’mot tơ’nôm mơngế pêi cheăng mơnhông cheăng kâ - pơlê pơla mê ối cho hvêa prôk pơ’lêh tuăn tơmiât ‘no liăn cheăng, ing tơdroăng pêi cheăng vâ ai hên tâ troh rah xo mâu tơdroăng tơkêa pro ki tơƀrê lĕm pêi cheăng rĕng tiô kơxô̆ pêi cheăng tung măng vâ châ hên roh pêi cheăng rah mâu tơdroăng tơkêa bro ki tơƀrê, kô kâi vâ mơnhông ăm tâk ton hơnăm ăm kong pơlê. Pôa Trương Công Thái,  Phŏ kăn hnê ngăn Vi ƀan Kuăn pơlê kong pơlê Dak Lak, tối:

“Hôp tơbleăng pơkâ hdró kong pơlê ƀă ‘no liăn cheăng hơnăm 2026 dêi kong pơlê Dak Lak, ƀă inâi tơdroăng tơkêa bro ƀă tâi tâng kơlo ‘no liăn mơjiâng pro tơmeăm khoăng ki mâu khu mơdró hiăng chêh inâi mê kô chiâng tối kố cho môi tung mâu rôh tơ’mot krếo thế ‘no hên liăn vâ pro tơmeăm khoăng cho kơxô̆ liăn ki hên má môi sap nah troh nôkố klêi tơ’mot péa kong pơlê Dak Lak ƀă Phú Yên. Ƀă kơxô̆ liăn tiah mê peăng kong pơlê tơkŭm tơbleăng ‘mâi hơ’lêh tơdroăng cheăng, pơ’lêh kơxô̆ pêi cheăng tung, hnê mơngế pêi cheăng ƀă mâu ngế pêi cheăng rơkê vâ pơxúa ăm tơdroăng tơkêa bro tung la ngiâ; má pái, cho ƀă tơdroăng cheăng pro hlá mơ-éa, sap ing apoăng drêng mâu khu ‘no liăn cheăng mot pêi cheăng mê ngin kô ai tơdjêp tơdrêng ƀă tơleăng mơnhên tơdroăng pá”.