Xuân ối xâu tơmiât troh tơdroăng tơnêi tơhnâp xua khía mơhot kân 13 plong mot mơ’nui hơnăm 2025 nah. Rơpâu met khô̆i tơnêi hmốu ing kong ngo Phương Mai tơhnâp króu kơđu 3 toăng hngêi, pro 1 ngế hlâ, 1 ngế tro rong ƀă hên rơpŏng kuăn pơlê thế châ hdâ hlối tơdrêng. Pôa Lê Văn Phụng, kuăn pơlê kơphô̆ 9, bêng Quy Nhơn tơngah, tơmeăm khoăng kơnâng tât tơnêi tơhnâp chiâng “Kế tât’’ kring vế kơpong kuăn pơlê tâng lơ ai mâu ing tơdroăng kong prâi ôh tá tơniăn:

“Kal ‘nâng xua rơnó mêi khía hiăng vâ chê troh. Tâng mơjiâng pro ôh ta teăm mê rơnó mêi kô trâm hên xơpá. Kuăn pơlê púi tơnêi têa rĕng pro klêi hlối krá kak ăm kuăn pơlê hmiân tuăn’’.

Klêi châ mơhno xoăng liăn vâ pêi cheăng, Vi ƀan kuăn pơlê bêng Quy Nhơn tơbleăng tơdroăng tơkêa bro kơnâng tât vâ tơkâ luâ xía vâ tơnêi ngo tơhnâp a Hải Minh pakĭng tâi tâng kơxô̆ liăn ‘no pro lối 10,2 rơtal liăn. Kơ nâng tât mê xŏn ngi hía 65m, xŏn tơngi ‘ngêi 4m, tơkŭm ƀă troăng cho mơ’no têa hiu ing chêng ngo troh a têa kơxĭ vâ kơdroh ki têi ing têa hiu hên ƀă lơ tơ’lêi tơnêi tơhnâp tung rơnó mêi. Pôa Nguyễn Quốc Hùng, teăng mâ tíu pêi cheăng meăn pro, ăm ‘nâi, vâ tơniăn tung pơla pro, khu mơjiâng pro đi đo tăng dâng 20 ngế kŏng nhân veăng pêi, rơtế tăng hên mâu rơxế kơmăi vâ kui tŏng, pêi cheăng rêm hâi ôh tá pơtê.

“Tơmeăm ing têa kơxĭ rơlố troh a kơno tuk, tung pơla chơ djâ troh a tíu plông vâ ‘măn tơkŭm ai hên troăng mê khu mơjiâng pro hiăng tăng hên rơxế trut chơ hmốu prê, vâ pêi cheăng plâ hâi măng vâ ai tơmeăm khoăng teăm pêi, meăn kơnâng mơdât vâ tât vâ rĕng klêi tơmeăm khoăng pơcháu pêi”.

Hơnăm 2026, kong pơlê Gia Lai pêi ahdrối cho ‘no liăn ăm pro mâu tơmeăm khoăng hbrâ mơdât ƀă tơkâ luâ xía vâ kong prâi pro ôh tá tơniăn a hên kong pơlê. Krê bêng Quy Nhơn châ xoăng ăm lối 52,7 rơtal liăn vâ ‘mâi rơnêu pro, mơjiâng mâu tơmeăm khoăng ki tro tơdjâk xua kong prâi pro ôh tá tơniăn; troh nôkố hiăng pro klêi 5 tơmeăm khoăng mê cho hngêi trung, tíu pêi cheăng a drô kơphô̆ ƀă tíu vâ pêi cheăng. Tung mê, tơdroăng tơkêa meăn pro kơnâng tât tơnêi tơhnâp a Hải Minh pakĭng châ mơnhên cho tơmeăm khoăng ki kal thế pro klêi hdrối rơnó mêi hngê vâ tơniăn ăm kơ pong kuăn pơlê ối a chêng ngo Phương Mai.

Tiô pôa Nguyễn Đức Toàn, Kăn hnê ngăn Vi ƀan kuăn pơlê bêng Quy Nhơn, tơmeăm khoăng mê hiăng pro châ dâng 80% tơdroăng cheăng pơcháu. Mâu kăn kong pơlê dế tơrŭm ƀă mâu tíu pêi cheăng mơjiâng pro tơkŭm hên mơngế, rơxế tơmeăm pêi vâ rĕng klêi troh tiô hâi khế pơcháu.

“Tíu pêi cheăng mơjiâng pro tơkŭm mâu ngế, rơxế, tơmeăm pêi, kơmăi kơmok ƀă tơmeăm pro vâ mơdêk rĕng tơbleăng pêi. Troh nôkố tơdroăng pêi pro hiăng châ dâng 80%. Vi ƀan kuăn pơlê bêng hiăng hnê mơhno kal mơdêk rĕng vâ hdrối rơnó mêi khía kơnâng mê thế klêi, tơniăn ăm tơmeăm khoăng ƀă ivá kuăn pơlê”.

Ƀă mơ-eăm pê klêi hdrối rơnó mêi, tơmeăm khoăng ôh ti xê tơkâ luâ xơpá xua kong prâi ôh tá tơniăn mê ối veăng kring tơniăn ivá châ chăn, tơmeăm khoăng dêi kuăn pơlê a chêng ngo Phương Mai, kum kuăn pơlê a bêng Quy Nhơn, kong pơlê Gia Lai hmiân tuăn tơniăn tung rêh ối hdrối mâu ai mâu tơdroăng pro kong prâi ôh tá tơniăn.