Tơdrêng amê diâp kơxuô tơmeăm mâu mô đô̆i rong râ, châi tamo, pôa Lê Minh Hưng, Ngế pro xiâm hnê ngăn tơnêi têa tối rơrêk tung ihiâm mơno trâu hơngế ƀă pơtroh rơkong kơ-êng tá ihiâm mơno, pâ mơnê hên troh tâi tâng mô đô̆i rong râ, châi tamo, ngế ai hnoăng ƀă kăch măng tung lâp tơnêi têa. Ngế pro xiâm hnê ngăn tơnêi têa mơnhên, pâ tơdroăng tơbâ lĕm ‘’khoh niân tiah hâi kố kơnôm ai hnoăng jâ nôa, pôa pâ nah’’ ƀă rơkong hnê dêi Pôa Hồ Chí Minh, Kăn xiâm hnê ngăn tơnêi têa hneăng apoăng, tung plâ 79 hơnăm hiăng hluâ, Đảng ƀă Tơnêi têa đi đo tơmâng, pêi pro lĕm tro tơdroăng pêi cheăng pâ mơnê hnoăng.

Mâu troăng hơlâ kơjo rế hía rế kêi đeăng, mâu ngế ki châ xúa po rơdâ. Tơdroăng pêi “Tâi tâng kuăn pơlê rak ngăn mâu rơpŏng mô đô̆i rong râ, hlâ hía ƀă mơngế ai hnoăng kăch măng” hiăng troh lâp lu ó rơdêi, tơdah châ tơdroăng môi tuăn ing lâp pơlê pơla. Mâu tơdroăng tuăn pâ ƀă pôu râng hnoăng cheăng mê hiăng tơdjêp chiâng tơdroăng ki lĕm rơkê trâu hơngế, tơdjêp khôi túa vâi krâ nah tuăn pâ dêi hdrông mơngế.

Ngế pro xiâm hnê ngăn tơnêi têa mơnhên: Ihiâm mơno khên tơnôu ƀă tơdroăng ki pleăng dêi mơheăm chhá dêi mô đô̆i rong râ, châi tamo cho tơdroăng ki chiâng dêi tuăn mơno troăng prôk ngế khên tơnôu kăch măng, cho tíu hgiân ihiâm mơno krá tuăn ihiâm mơno ăm tâi tâng khu cheăng kal kí tung tơdroăng pơhlêh nếo tơnêi têa.