Cho kong pơlê kong ngo, tơkăng kong peăng Tây Bắc, Sơn La ai vâ chê 275km troăng tơkăng kong achê ƀă kong têa Lếo; pơ’leăng mâ mơngế kơpêng 1,4 rơtuh ngế ƀă ai 12 hdrông kuăn ngo. Khĕn kơdeăn 6 tơdroăng hiăng pêi pro ki kong pơlê pêi châ tơƀrê tung hơnăm hdrối mê hía nah, tơƀrê hôm cho cheăng kâ - pơlê pơla rêh ối tơniăn, châ kring vế, pơtối mơnhông pêi chiâk pơtối prôk tro troăng hơlâ, mâu kơvâ túa lĕm tro, pơlê pơla ƀă pơtối tơmâng tŏng gum khât tung rêh ối, Kăn xiâm hnê ngăn Đảng, Kăn xiâm hnê ngăn tơnêi têa tối, mâu tơdroăng hiăng pêi châ tơƀrê mê mơhno ki tơrŭm dêi rơpó hbrâ pêi pro, pêi nhên khât, pêi tro hnoăng cheăng dêi Đảng ƀô̆, mâu kăn, mâu lêng, khu mơdró ƀă kuăn pơlê mâu hdroâng kuăn ngo kong pơlê Sơn La. 

Pôa pâ thế kong pơlê Sơn La tơmâng pơkuâ hnê, hnê mơhno 8 khu tơdroăng cheăng ki kal, tung mê, kal tơmâng, mơnhên túa vâ mơnhông tơƀrê ƀă tíu pêi cheăng dêi Sơn La tung kơpong Tây Bắc. Tối nhên troăng tơmiât, thế xo mơnhông tơƀrê kuăn mơngế, hnê mơhno, rak tơniăn ăm kuăn pơlê ối ƀă kơdroh kơklêa xăm kơtiê krá pro xiâm, Kăn xiâm hnê ngăn Đảng, Kăn xiâm hnê ngăn tơnêi têa tối pơchân, kong pơlê ki hdrối thế hbrâ tro tŭm tơdroăng hơnăm hriâm 2026 - 2027, pêi tro khăm ivá kuăn pơlê tro tiô hâi khế hiăng pơkâ ki iâ gá 1 hdrôh/hơnăm.