Hneăng hôp hiăng tơbleăng pêi pro Tơdroăng pơkâ, mơnhên 13 túa pơkâ pêi, 05 hnoăng cheăng châ tơƀrê hluâ pơkâ; 07 Tơdroăng, Tơdroăng tơkêa bro ki xiâm pêi pro tung hneăng hơnăm 2026 – 2031. Môi tíu ki nếo ai kơnâ kal khât mơnhên troăng prôk la ngiâ dêi hneăng cheăng kố cho Hneăng hôp mơnhên pêi pro tơdroăng “Rơxông ối nếo Việt Nam djâ troăng ahdrối tung chal nếo’’, mơjiâng ivá mơnhông mơdêk ihiâm mơno djâ troăng ahdrối, tơmiât pêi rơkê ƀă tơdroăng pói vâ pleăng hnoăng cheăng dêi droh rơtăm.

Hneăng hôp xuân mơnhên pêi pro tơdroăng  “Mơnhông tâi tâng droh rơtăm Việt Nam” tung hriâm tâp, mơnhông mơdêk tuăn ihiâm mơno; mơnhông mơdêk, pơtâp châ chăn; mơdêk tơdroăng rêh ối khôi túa lĕm tro ihiâm mơno. Ƀă ihiâm mơno “Rơkê tơnôu krá tơniăn – Djâ troăng ahdrối tung tơmiât pêi rơkê – Pói vâ pleăng hnoăng cheăng – Pơkuâ tơdroăng la ngiâ’’, Hneăng hôp kơbông krếo tâi tâng mâu râ khu, tâi tâng đoân viên droh rơtăm Việt Nam tung tơnêi têa ƀă kong têa ê hlê plĕng inhên hnoăng cheăng, pôu râng hnoăng cheăng; mơnhông mơdêk ó rơdêi hiâm mơno pâ nhuô̆m tơnêi têa, tơdroăng pói vâ mơnhông mơdêk, ihiâm mơno nhuô̆m hdrông mơngế, ki kơnâ khôi túa lĕm tro mơngế Việt Nam, pêi cheăng tâi ihiâm mơno dêi rơxông ối nếo vâ thâ pêi pro mâu tơdroăng ki xiâm hiăng châ Hneăng hôp tơbleăng pêi pro, mơjiâng tơdroăng ki hbrâ ăm môi hneăng nếo ƀă mâu tơdroăng ƀlêi trâng nếo.