Tối mơgêi a rôh Hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên tung pơla tơbriât cheăng tung lâp plâi tơnêi dế ó, tơdroăng tơbleăng Hlá mơ-éa pơkâ kơxô̆ 57 ôh ti xê to tơdroăng ki pá vâ tơkâ luâ xơpá ki rế lot mê ối djâ tơdroăng ki hlâ rêh ƀă tơdroăng pơkuâ dêi troăng hơlâ ƀă kring vế tơniăn Tơnêi têa.

‘Na ki pơ‘lêh kơxô̆ tơnêi têa, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, ki kal tung la ngiâ thế mơdêk rơdêi pơ’lêh kơxô̆ tung inâi khu mơdró ƀă tâi tâng pơlê pơla. Hbrâ mơngế vâ pêi cheăng tung la ngiâ, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế tung hơnăm hriâm 2026 kố, kơvâ hnê hriâm kal ai mâu tơdroăng pơ’lêh rơdêi tung tơdroăng vâ pêi pro, hnê mơhno dêi mâu kơvâ ‘na khoa hok ki kal, kŏng ngê̆ xiâm, hnê ăm rơxông nếo sinh viên ki mot hriâm đăi hok hơnăm kố kô pơkâ ngiâ méa dêi khu kăn ƀô̆ khoa hok kŏng ngê̆ xiâm dêi tơnêi têa tung 10 hơnăm la ngiâ.