Kăn xiâm hnê ngăn Kuô̆k hô̆i mơnhên Việt Nam đi đo nhuô̆m Mih cho môi tung mâu khu tơrŭm ki kal má môi; kheăn kơdeăn mâu troăng mơnhông mơdêk châ tơƀrê tung pơla kố nah. Kăn xiâm hnê ngăn Kuô̆k hô̆i pơkâ thế jâ Jennifer Wicks mơnhông hnoăng kông tơdjêp, tơrŭm rơtế peăng Việt Nam mơdêk tâ mê nếo mâu tơdroăng trâm mâ, tơpui tơno khu a mâu râ, ki má lối cho dêi kăn pơkuâ râ kăn xiâm; mơdêk tơdroăng tơpui tơno a mâu râ kăn, ki má lối dêi khu râ kăn xiâm; mơdêk pro rôh tơ’lêi tơpui tơno đi đo, păng ‘nâng pơla kơ koan mơjiâng luât péa tơnêi têa.

Ki má lối ƀă pôa Trần Thanh Mẫn, Kăn xiâm hnê ngăn Kuô̆k hô̆i, jâ Jennifer Wicks tối tơdroăng châ tơƀrê tơrŭm péa tơnêi têa kố ai tơdroăng veăng gum ki kal dêi tơrŭm cheăng ó rơdêi pơla péa Kuô̆k hô̆i; kheăn kơdeăn mâu tơdroăng ki má môi tung tơrŭm cheăng pơla Kuô̆k hô̆i péa tơnêi têa tung pơla kố nah.

Kăn teăng mâ mơnhên hbrâ tơrŭm krá tơniăn ƀă mâu khu xiâm, kơvâ cheăng, kơ koan, kong pơlê Việt Nam vâ mơdêk tơpui tơno a mâu râ ƀă mâu khu; môi tuăn tơdroăng péa pâ rĕng kêi đeăng tâi tâng tơpui tơno, kĭ tơkêa tê rôe tơmeăm ngi kong têa ê, tơdâng tơ’mô ƀă tơdrăng; tối rơdêi môi tuăn mơdêk tơrŭm tung mâu kơvâ nếo ô eăng, tung mê, peăng Mih tơmâng hên ‘na tơrŭm cheăng on tơhrik, khoa hok – kŏng ngê̆, pơhlêh xúa kŏng ngê̆; môi tuăn ƀă vêh mơnhên tơkêa mơdêk tơrŭm cheăng rơnêu kế tơmeăm khoăng xua tơplâ tơplong.