Tung mê, Khu pơkuâ Mơjiâng pro tơmeăm khoăng ối má môi lâp kong pơlê ƀă kơxô̆ tah kơdroh châ 75%; Khu pơkuâ Kơpong cheăng kâ ƀă Kơpong kơmăi kơmok châ vâ chê 70%. Hên hlá mơ-éa ki tơdjâk troh mơ’no liăn cheăng, mơjiâng pro tê mơdró châ kơdroh ‘nâng ‘nâi hên, ki má môi cho mơ-éa kơdroh rơdêi sap ing 32 chu u ối 17 hâi, gum khu tê mơdró mơdêk rĕng tơdroăng tơkêa bro.

Khu kăn pơkuâ Vi ƀan kong pơlê Khánh Hòa tối ăm ‘nâi, tơdroăng rơtế séa ngăn, kơdroh sap ing 10% troh 50% hâi khế pro mơ-éa rêh ối cheăng kâ ƀă tơnêi têa sap apoăng hơnăm troh nôkố cho troăng pêi ki kal vâ mơdêk châ tơƀrê tơdroăng pêi cheăng dêi troăng pêi khu râ kăn pơkuâ kong pơlê péa râ, ƀă kô pơtối mơdêk pêi pro tung la ngiâ.