Klêi kơ’nâi ‘mot tơkŭm mâu tíu pêi cheăng râ kong pơlê, Khánh Hòa po rơdâ tơnêi tơníu mơnhông cheăng kâ ƀă lối 8.700 km2 tơnêi ‘lâng, 65 to tíu pêi cheăng râ cheăm rơtế ƀă kơpong têa kơxĭ kân rơdâ. Pơkâ châ mơjiâng rak tơniăn, tro ƀă Luât pơkâ hơnăm 2025 ƀă tơmâng xo, tơpui tối sap ing mâu khu xiâm, kơvâ cheăng Tơnêi têa rơtế ƀă kuăn pơlê.

Tiô pơkâ, Khánh Hòa pơkâ tơmiât vâ chiâng tíu xiâm tơdjêp kơpong Kĭng têa kơxĭ Peă hdroh Tơnêi têa ƀă Tây Nguyên, xo Nha Trang – Đà Lạt pro ngế ki xiâm vâ mơjiâng tơnêi tơníu tơrŭm “Têa kơxĭ – Kong ngo”. Túa mơnhông cheăng kâ dêi Khánh Hòa châ mơnhên nhên tiô tơdroăng: “1 troăng ngăn tơdjuôm – 2 tíu cheăng – 3 tíu thăm mơnhông – 4 tíu ki mơnhông ivá”. Tung 4 tơdroăng ki xiâm mơnhông mơdêk dêi Khánh Hòa, tung mê, ai: ôm hyô rơkê plĕng; pơhlêh nếo tơmiât pêi rơkê ƀă tê mơdró kơxô̆; mơjiâng pro kong ngê̆ a têa kơxĭ; kơmăi kơmok uâ pơliê kế tơmeăm, mơjiâng pro kơmăi kơmok chal nếo ƀă hên ki ê.

Tơpui tối leăng tâ ‘na troăng pơkâ kố, pôa Châu Ngô Anh Nhân, Kăn pơkuâ Khu ngăn liăn ngân kong pơlê Khánh Hòa ăm ‘nâi:

“ ‘Na kơvâ on tơhrik, tơkŭm mơjiâng mâu túa on tơhrik nếo, on tơhrik vêh pro, tung mê, ai on tơhrik trếo tik nik a peăng Hdroh kong pơlê Khánh Hòa. ‘Na pơkâ vâ mơjiâng pro kơphô̆, thôn pơlê, hdrối hơnăm 2030, kong pơlê Khánh Hòa chiâng pơlê kong kân ối tung Tơnêi têa, mơjiâng pro 21 kơphô̆, tung mê ai 5 kơphô̆ túa má 2 ƀă mơ-eăm vâ pêi pro châ pơkâ kơphô̆ túa má 2 ƀă 16 kơphô̆ túa má 3”.

‘Na mâ ngăn troh hơnăm 2050, Khánh Hòa mơ-eăm chiâng tíu pêi cheăng kâ têa kơxĭ kân dêi lâp tơnêi têa, mơnhông mơdêk ngiât ƀă tơxâng kơpong châu Á. Tơpui a rôh hôp, pôa Nguyễn Việt Hùng, Kăn hnê ngăn Vi ƀan kong pơlê Khánh Hòa tối nhên, tơdroăng ki tơbleăng túa pơkâ ôh tá xê cho tíu ki mơgêi mê cho tíu ki pơxiâm ăm môi hneăng mơnhông nếo. Ki ƀlêi chiâng mê athế châ vê ngăn ƀă mâu tơdroăng tơkêa bro ki tơƀrê ƀă tơdroăng ki pơhlêh rĕng tung tơdroăng rêh ối kuăn pơlê. Kong pơlê Khánh Hòa tơhrâ mơnhông rĕng la krá, khŏm mơ-eăm ôh tá pơhlêh kong prâi, kế tơmeăm ƀă vâ xo ki mơnhông hdrối.

Vâ pro chiâng tơdroăng tơngah ăm kơxô̆ liăn ‘no pêi cheăng, pôa Nguyễn Việt Hùng, Kăn hnê ngăn Vi ƀan kong pơlê Khánh Hòa tối rơdêi:

“Pơtối tơkŭm lêi tah mâu tíu kreăng tung tơdroăng ki xơpá mơnhông, malối cho mâu tơdroăng pơkâ, tơnêi tơníu, ‘no liăn cheăng, xo tơnêi ƀă chêh pro hlá mơ-éa. Pơkâ hiăng po troăng tơnêi tơníu mơnhông. Hnoăng cheăng dêi pin cho athế pêi pro tơdroăng mê, tơdrêng amê ƀă khu mơdró kâ, mâu khu ki ‘no liăn cheăng mê á rơhêng vâ mâu vâi pó ngăn hlá mơ-éa chêh pro kố vâ ăm hmiân tuăn vâ pêi cheăng ton troh tá ah a Khánh Hòa”.