Ai 58 rơpŏng kŏng an ki kơhnâ rơkê châ ô eăng, teăng mâ ăm lối hrĭng rơpâu rơpŏng tung tâi tâng khu lêng Kŏng an kuăn pơlê. Rêm rơpŏng ai môi tơdroăng rêh ối cheăng kâ phá, môi tơdroăng cheăng krê, la pơrá trâm dêi rơpó a môi tíu tơdjuôm cho tơdroăng ki pleăng dêi hnoăng, veăng gum ƀă chiâng ngế ki ối pá rŏng krá tơniăn vâ kăn ƀô̆, kŏng an tơkâ luâ xơpá, pêi klêi hnoăng cheăng châ pơcháu.

Ki kơhnâ rơkê má môi cho môi tiah rơpŏng Trung tă Cù Thị Thu Hà, Ƀơrô kăn sat séa ngăn tơdroăng xôi ‘na matŭi, Kŏng an kong pơlê Phú Thọ. Peăng pa rŏng dêi ngế kơdrâi pơkuâ cho ngế kơnốu hbrâ rơnáu pôu râng mâu tơdroăng cheăng tung rơpŏng hngêi, chiâng tíu hơguân tơniăn lĕm vâ ngế kơdrâi krá tơniăn hmiên tuăn pêi cheăng. Ngoh Nguyễn Minh Luân, kơnốu Trung tă Cù Thị Thu Hà, tối:

“Ki xiâm dêi kơvâ cheăng kăn sat séa ngăn tơdroăng xôi ‘na ma tŭi gá rơ-iêo ƀă tơbrêi tơbrêh khât. Ai mâu hâi ki ‘nâ kơdrâi á lăm pêi cheăng sap ing kơxo má, troh kong măng dế xuân tá hâi vêh, krếo phôn mê ôh tá chiâng tơpui. Mâu rôh ki môi tiah mê, á bu ‘nâi to tơkôm ƀă rơhêng tâng ai tơdroăng ki tơniăn lĕm troh ƀă kơdrâi á. Hlê tơdroăng cheăng dêi ngế kơdrâi mê á ƀă rơpŏng hngêi đi đo rơtế prôk vâ kơdrâi á hmiên tuăn pêi cheăng”.

Tơpui hnê mơhno a rôh po tơdroăng, Thươ̆ng tươ̆ng Lê Quốc Hùng, Ngế cheăng tung tíu xiâm đảng, phŏ ngế xiâm pơkuâ Kŏng an tối rơdêi, ƀă khu lêng kŏng an kuăn pơlê, rơpŏng cho ngế ki krá rơdêi, cho tíu hơguân hiâm mơno tơ’nôm ivá vâ rêm ngế kŏng an tơkâ luâ mâu tơdroăng ki pá, rak vế tuưm rơkong tơhrâ xua tơdroăng cheăng rak vế tơnêi têa. Peăng pa rŏng dêi rêm ngế kŏng an ki khên tơnôu đi đo ai tơdroăng rơtế prôk, pleăng hnoăng ôh tá ai kơbố ‘nâi dêi mâu ngế pâ, nôu, kơdrâi, kơnốu ƀă mâu vâi kuăn tung rêm rơpŏng hngêi.

Vâ cheăng rơpŏng hngêi ƀă ngế gum cheăng ăm kŏng an rế hía rế mot trâu hngế, pôa Lê Quốc Hùng, phŏ ngế xiâm ngăn Kŏng an pơka athế rêm râ đảng, kăn pơkuâ mâu tíu pêi cheăng athế pơhlêh nếo túa tơmiât, tơdroăng tŏng gum rêh ối liăn ngân ƀă hiâm mơno ăm kăn ƀô̆ kŏng an, malối cho mâu kŏng an pêi cheăng a mâu kơpong hngế hngo, tơkăng kong lơ mâu tíu ki ê. Tơdrêng amê, mâu khu tơrŭm đoàn theh kal rak vế tơƀrê mâu tơdroăng cheăng tŏng gum rêh ối pơlê pơla môi tiah “Kuăn roăng Kŏng an cheăm” lơ “Nôu râng ko”.

Pôa Lê Quốc Hùng, phŏ ngế xiâm ngăn Kŏng an rơhêng vâ rêm rơpŏng hngêi pơtối mơdêk khôi hmâ, hnê hriâm kuăn muăn rêh ối tơniăn lĕm, veăng gum mơjiâng khu lêng kŏng an rế hía rế krá rơdêi tung chal mơnhông nếo dêi tơnêi têa:

“Á loi tiah kố, ƀă khôi hmâ khu lêng khên tơnôu, ai tuăn mơno hơ-ui, tơrŭm tơroâ dêi khu lêng kŏng an kuăn pơlê, ƀă tơdroăng ki rơtế prôk dêi mâu rơpŏng hngêi ƀă ivá khŏm mơeăm dêi tâi tâng pơlê pơla, rêm ngế kăn ƀô̆, kŏng an Kuăn pơlê a tâi tâng mâu kơvâ cheăng kô ai tơ’nôm ivá mơhnhôk, pleăng hnoăng cheăng vâ pêi klêi rơkê hnoăng cheăng pơcháu, veăng gum mơjiâng khu kŏng an Kuăn pơlê tung tơdroăng tơ’noăng “pơxâu luât khâti”, “tơdrăng môi tuăn khât” ƀă “achê ƀă kuăn pơlê khât”, xua tơdroăng rêh ối tơniăn lĕm dêi Kuăn pơlê”.