Nôkố lâp tơnêi têa ai vâ chê 25 rơtuh ngế vâi hdrêng. Tâi tâng vâi hdrêng pá xôp 6 hơnăm ƀă vâi hdrêng châ kơjo kum liăn rêm khế châ tơnêi têa hnâp ƀaoh hiêm khăm pơlât; tơdroăng pâk po rơdâ tơnêi têa hiăng troh lâp lu tâi mâu túa vaccine, kơxô̆ pâk tŭm ăm vâi hdrêng pá xôp 1 hơnăm châ 97%; hdrêng 5 hơnăm châ hriâm mẫu yăo.  Tơnêi têa tối oh tá êa nâp liăn hriâm ƀă mâu vâi hdrêng mầm non, hok tro phôh thong, mơngế hriâm tơdroăng hnê phôh thong tung hngêi trung hriâm dêi tơnêi têa ƀă kơjo kum liăn hriâm ƀă mâu vâi hdrêng mầm non, hok tro phôh thong, ngế ki hriâm tơdroăng hnê phôh thong tung hngêi trung ki khu kuăn pơlê kro mơdrŏng mơjiâng, hngêi trung krê.

Drêng ai tơdroăng rêh ối xơpá châ xo luât tŏng gum tơtro ƀă tơdroăng púi vâ ƀă tơdroăng mơnhông cheăng kâ - pơlê pơla dêi kong pơlê. Khu pêi pro tơdroăng kring vế vâi hdrêng 3 râ mê ai tá: Hbrâ mơdât, kơjo kum, veăng tơmâng ƀă dế châ tơbleăng pêi tơƀrê. A rôh Hôp, mâu kong pơlê, pơlê kong kân xuân hiăng tơpui leăng ‘na mâu tơdroăng hiăng pêi pro tung tơdroăng cheăng tơmâng tŏng gum ‘na vâi hdrêng a kong pơlê; xuân môi tiah pâ thế vâ tơdroăng kring vế, rak ngăn vâi hdrêng châ tŭm tâ.

Tối mơgêi a rôh Hôp, jâ Phạm Thị Thanh Trà, Phŏ ngế pro xiâm hnê ngăn hiăng tối tơdrăng mơhno mâu tơdroăng ki pêi pro ôh tá tro mê cho: Tơdroăng tơhôu tôu pâm dêi rơpó ƀă pro pơlăm pơlối vâi hdrêng xuân u ối hên ó; mơngế ki ‘mêi xo măng vâ pơlông djâ pro tơdroăng ôh tá tro, pro mơnhâu vâi hdrêng thăm rế kí tâ ƀă hên ki ê. Phŏ ngế pro xiâm hnê ngăn tơnêi têa pâ thế pro hlá mơ-éa pê klêi luât pơkâ tŏng gum vâ tơniăn tŭm teăm tơdrêng ‘na hnoăng rêh ối vâi hdrêng, hbrâ mơdât kơdroh ki oh tá mơhúa tơdjâk troh vâi hdrêng.