Troăng kân ăm phêp rơxế kơtâu ai ki xŏn 48 km, tung mê, 24km troăng kân, kơpong sap ing mơ’nui kong pơlê Gia Lai lăm Dak Lak hiăng châ djâ xúa sap hâi lơ 30/4. Troh nôkố, 24km ki ê xuân hiăng pêi kêi đeăng gum rơxế prôk lăm hlâu lĕm lâp troăng kân. Tiô Khu pơkuâ tơdroăng tơkêa bro 7, Khu xiâm mơjiâng tơmeăm, nôkố tơdroăng tơkêa bro tá hâi tơkŭm po xo hnoăng liăn xua dế mơjiâng pro, krâ 5 tíu xo hnoăng mơhá a mâu hơlâ troăng klông mot lo.

Klêi kơ’nâi pêi kêi đeăng, troăng kân kô châ xúa tơdroăng ki xo hnoăng liăn điê̆n tưh ôh tá tot ETC. Tung pơla xúa, mâu khu ki tơdah pro xuân pơtối pêi kêi đeăng mâu tơmeăm ki u ối môi tiah troăng klông ki rơkê, tíu ki xo hnoăng mơhá liăn ƀă pêi pro tơdroăng tơkêa rơnêu bro tê kơtê tâng tơ’nhê tiô pơkâ.