Teăng mâ kăn pơkuâ hnê ngăn Đảng, Tơnêi têa diâp Mê dái Rak vế Tơnêi têa ối má Môi ăm Mố đô̆i Lêng kơnŏng – Răng on, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa rơkâu mâu tơdroăng kơhnâ rơkê dêi Mố đô̆i Lêng kơnŏng – Răng on.

Pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa pơkâ thế, tung la ngiâ, tâi tâng khu Lêng kơnŏng – Răng on tơkŭm pêi pro tro 5 khu tơdroăng cheăng, tung mê tơkŭm mơjiâng khu lêng krá rơdêi ‘na kal kí, hiâm mơno ƀă pêi cheăng; athế tơdrăng ƀă Đảng, Tơnêi têa ƀă Kuăn pơlê; athế pêi pro tro “2 tơdroăng pơkâ, 2 tơdroăng mơdêk rơdêi, 2 hbrâ mơdât” ƀă túa pơkâ “5 rơdêi”; mơjiâng cheăng kal kí rơdêi, kơtăng, kong ngê̆ krá rơdêi, ngê̆ thuât cheăng lêng krá rơdêi, tơdroăng rêh ối mố đô̆i krá rơdêi.

Mơjiâng Đảng ƀô̆ Khu pơkuâ ngăn Lêng kơnŏng – Răng on krúa, rơdêi kơhnâ; kơ koan, tíu pêi cheăng kơtăng, pêi klêi rơkê mâu tơdroăng cheăng châ pơcháu.