Tung pơla kong dế tôu ó a mơ’nui khế 6, a kơpong ki pêt kơtếo thôn Thanh Minh, cheăm Suối Trai, kong pơlê Dak Lak lối 2 ha kơtếo dêi pôa Ale Văn Đăng, 77 hơnăm hiăng ko dêi lối 1 măng tĭng xuân dế ối ‘măn lôi a deăng ki dâi lĕm gá chiâng kơdroh rêm hâi. Klêi lối 1 măng tĭng ko, kơtếo hiăng khăng luâ 1/3. Pôa Ale Văn Đăng tôu tuăn:

“Ko hiăng châ 10 hâi la ôh tá ai rơxế lăm chôu. Krếo phôn ăm tíu roê mê vâi tối ôh tá ai rơxế, hngêi kơmăi tơ’nhiê. Pôa ôh tá ‘nâi pro tiah lâi. Kuăn á krếo phôn ôh tá ‘nâi to lâi chât xoh xếo, kuăn á krếo phôn troh a cheăm há. Nôkố kơtếo hiăng răng tâi, ôh ti ai kli klâi xếo”.

Drô troăng kân kơxô̆ 19C troăng ki prôk tơkâ luâ mâu cheăm Suối Trai, Sơn Hòa, Vân Hòa ƀă hên mâu cheăm ki ê hlo to mâu kơtếo ‘măn môi tíu ki vâi hiăng ko. A hên ƀăng deăng pêt kơtếo ki ê, kơtếo hiăng luâ hâi khế ko lối 3 khế xuân ối ‘măn tơkŭm a deăng, ôh tá ‘nâi drêng lâi ah nếo ai tơdroăng thế ko. Ngế ki pêt kơtếo ăm ‘nâi, tá hâi la lâi mâu ngế ki pêt kơtếo trâm pá môi tiah hơnăm kố:

“Mê pin ko gá răng xuân môi tiah on kơ-óu gá. Nôkố hmôu pơ têng khăng a tôu môi tiah kố tá hâi châ ko, kuăn pơlê ‘nâi krếo kơbố?”.

Tơdroăng kố xuân cho tơdroăng ki trâm tơdjuôm dêi hên ngế kuăn pơlê pêi chiâk pêt kơtếo a mâu kơpong ki pêt hên kơtếo peăng mâ hâi lo kong pơlê Dak Lak. Riân ngăn tá hâi tŭm, troh mơ’nui khế 6, krê a kơpong pêt kơtếo tơring Sơn Hòa hdrối nah ai iâ hlái 600 ha kơtếo tá hâi châ ko, châ sap ing 10 – 12% ƀăng tơnêi pêt (ngăn kơ rêm cheăm). Pơtih môi tiah a cheăm Sơn Hòa, cheăm ai ƀăng tơnêi pêt kơtếo kân dêi kong pơlê Dak Lak ƀă lối 8.000 ha, troh nôkố hiăng ko châ lối 7100 ha, xuân ối vâ chê 950 ha tá hâi châ ko. Cheăm hiăng pêi cheăng ƀă hngêi kơmăi pro xik KCP pro mơdon hâi khế uâ kơtếo ƀă roê xo tâi kơtếo dêi kuăn pơlê.

Pôa Nguyễn Duy Tình, Phŏ hnê ngăn Vi ƀan cheăm Sơn Hòa, kong pơlê Dak Lak, ăm ‘nâi:

“Hlo tơdroăng kố Vi ƀan hnê ngăn cheăm hiăng pêi cheăng tơdrêng ƀă Khu pơkuâ kŏng ti hngêi kơmăi pro xik KCP vâ pro tiah lâi sap ing nôkố troh mơ’nui khế 7 hơnăm 2026 kô ko tâi tâng kơtếo dêi vâi krâ nhŏng o vâ ví ki tro lŭp. Drêng hrá ko mê kô pro kơdroh ki dâi lĕm ăm rơnó kơ’nâi”.

Rơnó kơtếo hơnăm kố, mâu ngế ki pêt kơtếo Dak Lak trâm hên xơpá: kong mê têa kân chiâng lŭp ăm rơnó; yă tê chu kơdroh xua xik hrá châ tê; kong tô mơdrăng khăng khoăng ton pro lối 1.000 ha kơtếo tro on chếo ƀă troh mơ’nui rơnó lối rơpâu ha kơtếo xuân ối a deăng  tung pơla hâi mung vâi pêi cheăng ko ôh tá ai ƀă yă liăn mung to kơnâ rêm hâi, sap ing 28 – 30 rơtuh liăn ăm 100 tâ̆n kơtếo. Môi rơnó kơtếo ki khéa kho ƀă kuăn pơlê pêt kơtếo a peăng mâ hâi Lo kong pơlê Dak Lak.