Tiô tối tơbleăng a rôh hôp, 6 khế apoăng hơnăm 2026, tâi tâng khu lêng hiăng rak vế kơtăng troăng hơlâ ki hbrâ rơnáu tơplâ, ‘nâi nhên tơdroăng vâ teăm tí tăng ‘nâi plĕng ăm Đảng, Tơnêi têa pơkâ tơleăng rơkê plĕng, tơƀrê mâu tơdroăng ki trâm, rak vế krá rơdêi hnoăng pơkuâ tơnêi tơníu.

Tung la ngiâ, tâi tâng khu lêng môi tuăn khât tơdroăng hnê mơhno dêi pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa, kăn xiâm pơkuâ ngăn Đảng lêng Tơnêi têa, mê cho ivá khŏm mơ-eăm mơnhông, pêi klêi hnoăng cheăng hơnăm 2026.

Tung mê, mâu hnoăng cheăng ki kal cho mơdêk ivá tối tơbleăng tơdroăng cheăng tung la ngiâ, teăm pêi tơdrêng pơkâ tơleăng ƀlêi chiâng mâu tơdroăng ki trâm, ôh tá ăm tro kơdrâ; pơkâ mơ’no ‘mâi rơnêu tơdroăng cheăng tung la ngiâ rak vế Tơnêi têa tơtro ƀă tơdroăng ki ai khât. Rak vế kơtăng tơdroăng ki hbrâ rơnáu tơplâ; rak vế krá tơniăn kơpong hbo plêng, kơpong têa kơxĭ, tíu tơkăng kong ƀă tung măng.

Ngăn nhuô̆m tơ’mot mâu ngế ki rơkê pêi châ tơƀrê tiô tơdroăng pơkâ thế dêi chal nôkố; mơdêk rơdêi hriâm tâp ƀă pêi tiô hiâm mơno, hiâm mơno, túa rêh ối Hồ Chí Minh mơdêk tơƀrê tơdroăng cheăng hnê mơhnhôk.