Tung tơdroăng ki ƀriê tung tuăn mơno, Khu ki pêi dêi hnoăng cheăng Tơnêi têa hiăng mơdoh 1 phut tơbâ ƀă mơnê 192 ngế ngoh mố đô̆i dế ối pơtê a ilâng. Ngế pro xiâm hnê ngăn tơnêi têa ƀă khu ki pêi dêi hnoăng cheăng tối mơnê khât ƀă plâ rơxông chôu pâ hnoăng cheăng kân dêi mâu ngoh mố đô̆i hiăng pleăng dêi hnoăng, hlâ rêh xua tơdroăng cheăng kăch măng khên tơnôu dêi Đảng, dêi hdrông mơngế.

Chôu vế tơdroăng “Pâ troh mâu ngế ai hnoăng”, Đảng, Tơnêi têa ƀă Kuăn pơlê pin đi đo mơdoh tơdroăng tŏng gum ƀă mâu ngế ai hnoăng ƀă kăch măng; ôh tá la lâi pơtê rak ngăn tơdroăng rêh ối liăn ngân, hiâm mơno dêi mâu mố đô̆i tro rong, mố đô̆i châi tamo, nhŏng o rơpŏng hngêi mâu mố đô̆i ki ai hnoăng; tơdrêng amê hlối pơtối rak vế, mơnhông khôi hmâ pâ nhuô̆m tơnêi têa, tơbêng tơdroăng lĕm tro kăch măng, tơbêng tơdroăng púi rơhêng vâ pleăng, mơjiâng ƀă rak vế krá tơniăn Tơnêi têa tung mâu rơxông hâi kố ƀă xo ah hmôi.