Rơkâu jâ Jennifer Wicks châ pôk pro kăn teăng mâ Mih a Việt Nam, Ngế pro xiâm hnê ngăn tơnêi têa pơtroh rơkong kơ-êng troh pôa Donald Trump, Kăn xiâm pơkuâ kong têa Mih ƀă rơkâu Chin phuh, kuăn pơlê Mih drêng tơbâ 250 hơnăm hâi mơjiâng. Ngế pro xiâm hnê ngăn tơnêi têa tối rơdêi Việt Nam ngăn Mih cho môi tung mâu ngế ki tơrŭm cheăng kal xiâm; môi tuăn ƀă Mih tung hnoăng cheăng pêi pro kơhnâ ăm tơdroăng hơniâp lĕm, tơniăn ƀă kro mơdrŏng a kơpong ƀă tung lâp plâi tơnêi.

Ngế pro xiâm hnê ngăn tơnêi têa tối tiah kố, péa pâ kal mơdêk tơrŭm cheăng kâ tê mơdró tiô troăng tơniăn lĕm, krá ton, rơtế ai pơxúa; rĕng lêi tah tơvâ tơvân ƀă rĕng chêh pro klêi tơdroăng vâ hôp tơpui tơno, kĭ tơkêa tê mơdró pơla péa pâ, tơdâng tơ’mô, rak tơniăn vâ khu mơdró kâ péa tơnêi têa po rơdâ ‘no liăn pêi cheăng, mơjiâng pro tơmeăm, tê mơdró.

Jâ Jennifer Wicks - Kăn teăng mâ ăm ‘nâi, kong têa Mih ngăn nhuô̆m tơrŭm cheăng ƀă Việt Nam; ƀă tơdroăng “hâk tơngăm cho tơnêi têa tơrŭm cheăng dêi Việt Nam” rơtế ƀă rơkong mơnê sap ing pôa Donald Trump, Kăn xiâm pơkuâ kong têa Mih ƀă pôa Marco Rubio, Ngế xiâm tơpui kâ troh khu râ kăn xiâm Việt Nam klêi kơ’nâi mâu rơkong rơkâu drêng klăng 250 hơnăm hâi mơjiâng kong têa Mih.

Kăn teăng mâ tối nhên, tơrŭm cheăng kâ tê mơdró pơtối cho tơdroăng ki kơjo pêi apoăng tung hneăng pêi cheăng dêi jâ. Kăn teăng mâ rơhêng péa pâ rak vế tơpui tơno vâ rĕng châ rơhéa tơdroăng tơkêa tê mơdró tiô túa pơkâ mơnhông, tơrŭm tơxâng, tơdâng tơ’mô, ing mê pro chiâng tơ’nôm rôh cheăng kâ, ‘no liăn pêi cheăng ăm tá péa tơnêi têa.