Kơxo lơ 1/7, pơkuâ po Rôh hôp lâp tơnêi têa mơgêi túa pơkâ pêi kăn pơkuâ 3 râ, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa pơkâ thế pơtối chêh pro klêi troăng hơlâ, mơdêk rơdêi klâ xoăng râ, xoăng hnoăng pơkuâ tro ƀă séa ngăn hnoăng cheăng pơkuâ, mơjiâng khu kăn ƀô̆ pêi châ tiô tơdroăng pơkâ thế, rak vế tơniăn kơ koan cheăng tơnêi têa nếo pêi cheăng tơƀrê, kơhnâ, xêt, pêi cheăng ăm kuăn pơlê tro tâ ƀă khu mơdró kâ. Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa tối rơdêi troăng hơlâ klâ xoăng, pro rế lĕm kơ koan cheăng tơnêi têa dêi Khu xiâm cheăng kal kí gá tơtro, kal khât ƀă ai pơxúa tung la ngiâ ƀă tơdroăng mơnhông tơnêi têa.

Tung la ngiâ ah, kal séa ngăn, chêh pro klêi tơdâng tơ’mô troăng hơlâ luât, ƀă troăng hơlâ, ƀă tơdroăng cheăng kăn ƀô̆, ƀă tơdroăng lăm ngăn, séa ngăn, mơnhên tối tơdroăng cheăng. Athế rak tơniăn tơdroăng pơkuâ tŭm têk dêi Đảng, la ôh tá pêi teăng, tơmâng ngăn, pôi tá veăng ‘na mơ-éa chêh pro ki ôh tá kal tung mâu kơvâ cheăng, hnoăng cheăng dêi mâu kơ koan tơnêi têa, Măt trâ̆n tơnêi têa ƀă mâu khu tơrŭm cheăng kal kí – rêh ối pơlê pơla.