Khĕn kơdeăn tơdroăng tơpui kâ ing klêi kơ’nâi rôh Hôp má 14 dêi Đảng châ tơpui hên tơdroăng ki kal, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế Khu Hnê mơhno pơtối rak vế hnoăng cheăng tơrŭm tiô troăng hơlâ, tơleăng mơnhên mâu tơdroăng ki kân, tơdjâk troh. Kơ koan cheăng cho dêi Khu xiâm tơpui kâ châ pơcháu pê klêi mâu tơdroăng mơ’no thế pêi pro tiô troăng  hơlâ “6 nhên”: Nhên mơngế, nhên tơdroăng cheăng, nhên hâi khế, nhên hnoăng cheăng, nhên tơmeăm, nhên hnoăng pơkuâ.

‘Na tơdroăng pêi pa ngiâ kal tơmâng pêi mâu tơdroăng tung 6 khế mơ’nui hơnăm 2026, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơhno nhên tơdroăng kal pê klêi tơdrêng mâu hlá mơ-eá vâ Khu hnê mơhno pơkuâ ngăn môi tuăn, pêi cheăng tơƀrê; pơcháu ăm Kơ koan Khu Hnê mơhno pơkuâ, tơrŭm ƀă Khu xiâm ngăn ‘na luât, Khu xiâm ngăn tê mơdró, mâu kơvâ cheăng, khu xiâm kơvâ cheăng, kong pơlê tơdjâk séa ngăn tâi tâng pêi pro tơdroăng tơhrâ, tơdroăng púi vâ lâp plâi tơnêi, tơdroăng tơhrâ lâp plâi tơnêi ki kal; tơkŭm mơgêi 1 hơnăm pêi pro tiô pơkâ 59; hbrâ mơjiâng troăng hơlâ tơpui kâ tŭm tơdroăng a râ ki kân tâ nếo.