Hneăng 2022-2026, rêm râ Khu xiâm Đoân hiăng mơdêk rơdêi hơ’lêh nếo tơdroăng hnê tối, hnê mơhno, hbrâ pơlêh kơxô̆, mơnhông tơƀrê mâu tơdroăng hnê tung măng. Tâi tâng Đoân mơhnhôk châ lối 6,5 rơtuh ngế đoân viên ƀă vâ chê 49 rơtuh ngế droh rơtăm veăng mâu tơdroăng pleăng hnoăng tơná. Khĕn kơdeăn mâu hnoăng hiăng châ pêi pro.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối vâ môi tuăn ƀă troăng hơlâ, pơkâ ƀă mâu tơdroăng cheăng pêi ki nếo, hlối tối nhên pơkâ kal pêi trâu rơdâ mâu tơdroăng hnê ‘na troăng hơlâ kăch măng, thăm hnê hiâm mơno pâ nhoăm tơnêi têa, kên tơnôu tơdroăng kal kí, hiâm mơno lĕm, tơdroăng rêh ối ƀă púi vâ pleăng hnoăng ăm droh rơtăm. Đoân Droh rơtăm kal thế tơmâng tâ nếo troh tơdroăng pêi cheăng, tơdroăng rêh ối túa lĕm tro ƀă tơmâng droh rơtăm a mâu kơpong, khu ngế ki ối hên tơdroăng xơpá.