Tơdroăng hnê tơ’nôm tối tơbleăng tơdroăng kal po sap ing hâi lơ 17/8/2026 ƀă tơdroăng ki veăng ai mâ dêi 63 ngế hriâm cho mâu ngế cheăng tung pơkuâ xiâm Đảng. Tơdroăng kố cho vâ tối tơbleăng ki kal ‘na lĭ luâ̆n, ki ai khât nếo má môi, mơdêk ivá pơkuâ, tơdjâ ăm kăn ƀô̆ tung la ngiâ dêi Đảng tung hneăng nếo. Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, lâm hnê tơ’nôm kố châ tơkŭm po tung hơnăm ki apoăng tơbleăng pêi Pơkâ Hneăng hôp XIV dêi Đảng, Hnoăng cheăng pơkâ nôkố cho tơkŭm pêi pro: pơhlêh troăng hơlâ chiâng ivá pêi pro, tơdâng tơ’mô ƀă nhên; pro ăm hiâm mơno dêi Đảng pơhlêh chiâng tơdroăng ki mơnhông dêi tơnêi têa ƀă tơdroăng rêh ối tơniăn lĕm dêi kuăn pơlê.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, rêm ngế hriâm ôh tá xê to pơkuâ môi kơvâ cheăng, lơ môi to kong pơlê, mê ối cho mâu ngế tung Khu pơkuâ ngăn Tơnêi têa – kơ koan pơkuâ kân má môi dêi Đảng pơla péa hneăng hôp kân. Xua mê, athế tơmiât tiô túa râ tơnêi têa, pêi pro xua ki pơxúa tơdjuôm, rơtế ƀă Tơnêi têa chiu pôu râng hnoăng cheăng a ngiâ Đảng, a ngiâ Kuăn pơlê ‘na mâu tơdroăng pơkâ ki kal ƀă tung la ngiâ dêi tơnêi têa.