A hneăng hôp má 2, Hô̆i đong kuăn pơlê kong pơlê Dak Lak hneăng má XI, hneăng hơnăm 2026 – 2031 hiăng rah xo mơngế pêi cheăng ối tung hnoăng, rak xo tơ’nôm mâu Phŏ Kăn hnê ngăn Viƀan kuăn pơlê kong pơlê ƀă Kăn cheăng tung Viƀan kong pơlê, tơdrêng amê séa mơnhên ngăn ăm pơtê cheăng môi Kăn cheăng tung Viƀan kong pơlê vâ rah xo tŭm tâi tâng khu râ kăn pơkuâ, pơkuâ dêi Viƀan kong pơlê.

Hô̆i đong kong pơlê Dak Lak hiăng têk kŏng môi tuăn rah xo pôa Y Nhuân Ƀyă, Tĭnh ŭy viên, Phŏ Kăn Khu tơkŭm po tơdroăng cheăng Tĭnh ŭy to pro Phŏ Kăn hnê ngăn Viƀan kong pơlê Dak Lak hneăng má XI, hneăng hơnăm 2026 – 2031.

Rah xo pôa Hồ Quang Đệ, Tĭnh ŭy viên, Kăn pơkuâ Khu mơjiâng pro tơmeăm khoăng to pro Ŭy viên Viƀan kong pơlê Dak Lak hneăng má XI, hneăng hơnăm 2026 – 2031. Hô̆i đong kong pơlê Dak Lak xuân têk kŏng môi tuăn tơbleăng pơkâ mơnhên tơdroăng ăm pơtê cheăng Ŭy viên Viƀan kong pơlê Dak Lak hneăng má XI, hneăng hơnăm 2026 – 2031 ƀă pôa Trần Văn Tân, cho Kăn pơkuâ Khu rak liăn, xua châ rah xo, xing xoăng hnoăng cheăng ki ê. Tơdroăng rah xo tŭm tâi tâng mâu kăn pơkuâ Viƀan kong pơlê Dak Lak châ pêi pro tiô pơkâ dêi luât, tơxâng pơkâ rah xo bro lế lĕm tro, rah xo tŭm tâi tâng khu râ kăn pêi cheăng klêi kơ’nâi  pêi pro mâu pơkâ ‘na tơdroăng rah xo mâu kăn ƀô̆, tơdrêng amê tơniăn mơdêk ki xêt khât, châ tơƀrê pơkuâ, hnê mơhno dêi khu râ kăn pơkuâ kong pơlê tung hneăng nếo.