A hôp tơno tơdroăng cheăng ‘na troăng pơhlêh pêt mơjiâng tơmeăm krúa lĕm ƀă pêi pro túa pơkâ tơtro ESG (Kong prâi – Pơlê pơla – Pơkuâ) xua Vi ƀan kong pơlê Gia Lai tơkŭm po, lối 120 kăn teăng mâ cho mâu ngế ki rơkê, ngế pơkuâ ƀă khu tê mơdró hiăng rơtế tơpui tơno mâu troăng gum khu tê mơdró kâi trâng ƀă pơkâ nếo dêi kơchơ mơdró. Hên rơkong tơpui tối, pơhlêh ngiât lĕm cho pơkâ ki thế pêi pro vâ khu tê mơdró rak tơmeăm, po rơdâ kơchơ mơdró ƀă mơdêk ivá tơbriât cheăng.

Mâu ngế rơkê xuân mơhnhôk khu tê mơdró kal pơhlêh tơtro cho kơxô̆ liăn mơ’no ăm tơtêk krá tơniăn teăng xua kơxô̆ liăn ki nếo ai. Xông tơpui a hôp tơno tơdroăng kal, pôa Phạm Anh Tuấn, Kăn hnê ngăn Vi ƀan kong pơlê Gia Lai mơnhên, hneăng hơnăm 2026 – 2030, kong pơlê kô mơdêk pơhlêh xúa kŏng ngê̆ măng internet, pơhlêh pêi cheăng krúa lĕm, mơnhông mơdêk kơmăi kơmok uâ mơdiê, on tơhrik ki vêh pro ƀă pêi chiâk deăng xúa kŏng ngê̆ rơxông nếo.

Kong pơlê xuân tơkêa pơhlêh rơdêi ing troăng tơmiât pơkuâ troh pêi hnoăng cheăng tơná ăm vâi, rơtế khu tê mơdró tung tơdroăng pêi pro mâu tơdroăng tơkêa bro.

‘’Kong pơlê Gia Lai kô ai troăng pêi rơtế ƀă khu tê mơdró tung pơhlêh i lĕm. Tơnêi têa kô tŏng gum mâu tơdroăng pêi cheăng inhên ing mâu troăng hơlâ. Laga ki kal má môi cho tơdroăng hlê plĕng dêi ngế ối a ko khu râ kăn pơkuâ, khu tê mơdró thế hlo kô cho pơklât pơhlêh vâ rêh pêi cheăng. Kong pơlê kô pơtối hnê mơhno, kâi trâng pêi pro pơhlêh pêi cheăng krúa lĕm a kong pơlê ƀă ihiâm mơno rĕng tâ, kơtăng tâ ƀă châ tơƀrê tâ’’.

Ôh á xê tung kơvâ kơmăi kơmok, pơhlêh pêi krúa lĕm dế châ kong pơlê Dak Lak mơnhên cho troăng prôk ki kal vâ mơnhông tơdroăng pêi chiâk deăng tiô rơxông nếo ƀă krá tơniăn. Pơla kố nah, a hôp tơno “Mơnhông pêi chiâk deăng kŏng ngê̆ rơxông nếo: Rôh tơ’lêi ƀă troăng pêi cheăng ton xŏn ăm khu tê mơdró”, mâu ngế ki rơkê mơnhên, mơhé pơkuâ lối 824.000ha tơnêi pêt mơjiâng tơmeăm pêi lo ing chiâk deăng rơtế hên tơmeăm tê ngi kong têa ê ki xiâm, laga tơdroăng mơhnhôk mơ’no liăn cheăng tung pêi chiâk deăng xúa kŏng ngê̆ rơxông nếo xuân tá hâi tơxâng ƀă tơmeăm ki ai hlâu.

Mâu tơdroăng ki mơdât kân nôkố cho ôh tá tŭm mơngế pêi cheăng rơkê, hngêi trăng, troăng klông tá hâi tơdâng tơ’mô, tơnêi ối iâ ƀă mơ-éa ối pro ton. Tiê̆n sih Bùi Thị Ngọc Dung, Viê̆n Pơkâ pêi ƀă mơjiâng pro tơdroăng pêi chiâk deăng tối:

‘’Thế ai tơnêi krúa lĕm vâ tơbleăng ăm khu mơ’no liăn cheăng. Má péa nếo cho tơdroăng ki khŏm mơ-eăm dêi khu râ kăn pơkuâ kong pơlê rơtế ƀă mâu cheăng, kơvâ cheăng, mâu kong pơlê, mơ-eăm pôe kơdroh mâu tơdroăng pro mơ-éa lối hên tiô pơkâ “pŭn kơdroh” vâ pro ti lâi ăm khu tê mơdró châ achê rĕng má môi ƀă vâi rĕng ai tơdroăng tơkêa bro má môi. Troăng pêi cheăng má pái cho ‘na mơngế pêi cheăng ƀă xúa kŏng ngê̆ măng internet tâi tâng mâu ‘noăng chư chêh kơvâ pêi chiâk deăng. Drêng khu tê mơdró mot vâi kô châ achê hlo kơxô̆ tơdrăng ƀă cho inhên má môi’’.

Tiô Tiê̆n sih Phan Việt Hà, Phŏ Kăn pơkuâ Viê̆n Khoa hok Kih thuât Nông lâm ngiêp Tây Nguyên, mơnhông pêi chiâk deăng xúa kŏng ngê̆ rơxông nếo ôh tá xê to mơnhông châ tơƀrê drêng ai tơdroăng ki tơdjêp krá pơla Tơnêi têa, ngế cheăng khoa hok, khu tê mơdró ƀă pêi chiâk deăng, ing mê rah xo ƀă hnê kŏng ngê̆ tơtro ƀă tơdroăng ki pơkâ rêm kong pơlê, mơjiâng tơdroăng pêi ki kơnâ krá tơniăn.

‘’Ki kal cho kô tơdjêp khu tê mơdró ƀă khu cheăng khoa hok ƀă khu pơkuâ. Vâ kô chiâng rah xo mâu kŏng ngê̆ tơtro má môi, ing mê xúa kŏng ngê̆ tơtro ƀă pơkâ dêi kong pơlê vâ kô mơnhông kŏng ngê̆ ki mê drêng nôkố’’.