Klêi kơ’nâi tơdroăng Pơkâ 36 châ pơtroh, a Khu pêi cheăng tơrŭm Nông nghiệp Xanh Krông Păč, tơdroăng ki ro mơhno nhên a ngiâ dêi mâu ngế cheăng tung khu. Hên hơnăm hdrối, khu pêi cheăng tơrŭm ƀă 7 ngế cheăng ki păng ‘nâng, lối 200 rơpŏng tơrŭm ƀă lối 120 ha sầu riêng hiăng kơhnâ mơ-eăm pêt tiô pơkâ VietGAP, xúa hlá mơ-éa chêh tung điê̆n tưh, mơjiâng pro túa pơkuâ ngăn kơpong pêt tơniăn tro. Laga, maluâ lối 70% ƀăng tơnêi pêt hiăng châ tiô pơkâ VietGAP, khu pêi cheăng tơrŭm xuân tá hâi châ hbru ăm mah kơxô̆ kơpong pêt xua hên ƀăng tơnêi pêt tơvât hdrê loăng, tá hâi châ tiô pơkâ thế ‘na kơpong pêi môi túa hdrê tiô pơka hdrối nah.

Pôa Trần Văn Thắng, Kăn pơkuâ Khu pêi cheăng tơrŭm ăm ‘nâi tơdroăng pơkâ kơxô̆ 36 châ po cho rôh tơ’lêi hlâu vâ mâu kơpong pêt ki khât, pêi tiô tơdroăng pơkâ hdrối nah tro trâm tơvâ ‘na chêh pro mơéa châ xúa rĕng tâ ƀă kơchơ tê mơdró ngi kong têa ê.

“Ngin mơnhên tối khât tơdroăng ki Chin phuh tối tơbleăng rĕng, pơkâ pêi kơtăng vâ ‘mâi pơhlêh mâu tơdroăng ki ôh tá tơniăn dêi Pơkâ 38. Tơdroăng mê kô lêi tah mâu tơdroăng ki xơpá ăm kuăn pơlê pêi chiâk ƀă khu pêi cheăng tơrŭm. Mâu kế tơmeăm hiăng pêi tro pơkâ kố ai rôh ki tơ’lêi hlâu vâ châ tê ngi kong têa ê, ivá tơxup tơbriât dêi sầu riêng Việt Nam kô châ mơdêk. Á loi tiah kố vâi krâ kuăn pơlê kô hlê plĕng tâ tung tơdroăng ki rak vế dâi lĕm, ing mê sầu riêng Việt Nam chiâng vâ tơxup tơbriât ƀă châ tê troh mâu kơchơ tê mơdró kong têa ê”.

Mâu khu mơdró kâ ki tê tơmeăm ngi kong têa ê xuân mơnhên tối Pơkâ kơxô̆ 36 hiăng lêi tah tro “tíu ki pro pá” kân má môi cho hlá mơ-éa hbru ăm mah kơxô̆ kơpong pêt ƀă tíu ki tâ tung kơthung. Pôa Huỳnh Kiều, teăng mâ khu mơdró kâ tê sầu riêng ngi kong têa ê a Dak Lak ăm ‘nâi, hồ sơ nôkố hiăng nâp, pơtroh ing troăng hyôh internet, klâ xoăng râ troh a cheăm ƀă hâi khế tơdah xo rĕng tâ kô gum pơhlêh kân ăm tơdroăng cheăng ki vâ tê tơmeăm ngi kong têa ê. Pôa Huỳnh Kiều xuân pâ thế mâu kơvâ cheăng ki ai tơdjâk pơtối pơkâ troăng pêi ki nhên mâu tơdroăng pơkâ vâ khu mơdró kâ tơ’lêi pêi pro.

“Pâ thế Khu ngăn cheăng kơmăi kơmok ƀă tê mơdró pêi pro pơhlêh mâu pơkâ chiâng troăng hnê mơhno ki tơ’lêi hlâu, tơ’lêi pêi pro vâ khu mơdró kâ tơ’lêi hlâu xúa, rak tơniăn tro pơkâ ƀă hâi khế tơdah xo chêh pro rĕng tâ. Tơdrêng amê, kơvâ xo hnoăng liăn mơhá kal ai troăng hnê mơhno nhên vâ khu mơdró kâ, khu ki roê ƀă kuăn pơlê kơpong pêt pêi pro tro pơkâ, vâ kơdroh iâ mâu tơdroăng ki ôh tá mơhúa ‘na nâp hnoăng liăn mơhá tung pơla tê roê, tê plâi sầu riêng ngi kong têa ê”.

Pơkâ kơxô̆ 36 ôh tá xê to châ tơngah lêi tah ki xơpá ‘na chêh pro hlá mơ-éa hbru ăm mah kơxô̆ mê ối pro ivá pơkâ tơleăng mâu tơdroăng ki ôh tá tơniăn tung tơdroăng ki tê plâi sầu riêng ngi kong têa ê. Tung lâp kong pơlê nôkố ai dâng 200 tíu ki tâ tung kơtung la bu ai dâng 16 tíu tê châ hbru ăm mah kơxô̆ chêh inâi pơklât thế xua Khu xiâm gâk ngăn tơkăng kong Sinuâ hbru ăm khu mơdró kâ kong têa ê mơjiâng pro, uâ pơliê lơ rak vế tơmeăm ƀă kế tơmeăm pêi lo ing chiâk deăng châ phêp tê ngi kong têa ê tiô troăng xiâm ngi kong têa Sinuâ (mah GACC); kơxô̆ kơpong pêt châ hbru ăm mah xuân ối iâ.

Tơdroăng kố pro hên khu mơdró kâ athế tê plâi ngi kong têa ê ing tíu cheăng ki ê, chiâng ai tơdroăng ki roê tê mah ƀă hên tơdroăng ôh tá mơhúa ‘na hoă đơn, chứng từ. Jâ Hoàng Thị Thanh Thủy, Kăn pơkuâ Kŏng ti Tiâ mơnhên nâp hnoăng liăn mơhá a Dak Lak ăm ‘nâi:

"Pơkâ kơxô̆ 36 nếo pơtroh á tâ phiu ro khât. Troăng hơlâ hiăng châ lêi tah môi iâ, hlá mơ-éa chêh pro hbru ăm mah rĕng ƀă tơdâng tơ’mô kô kơdroh tơdroăng ki ối kal mah kơpong pêt, ối kal tíu tâ tung kơtung, pro chiâng tơdroăng ki tơxup tơbriât tơdâng tơ’mô tâ. Ngin kô tŏng gum khu mơdró kâ ƀă kuăn pơlê pêi chiâk chêh pro klêi hồ sơ vâ rĕng châ hbru ăm mah kơxô̆”.

Pôa Lê Anh Trung, Kăn hnê ngăn Khu tơrŭm pêt plâi Sầu riêng kong pơlê Dak Lak tối, tơdroăng ki khu mơdró kâ tơkôm ôh tá xê to hlá mơ-éa châ rĕng pro klêi mê ối cho túa pơkuâ ngăn ki nếo. Tơdroăng pơhlêh troăng hơlâ chêh tối xêh, pôu râng xêh hlối tơrŭm mâu tơdroăng ki klêi kơ’nâi séa ngăn kô kơdroh ki xơpá ‘na hlá mơ-éa tơdrêng amê hlối mơdêk hnoăng cheăng pôu râng dêi mâu khu pơkuâ tung tâi tâng mâu tíu pêt.

“Á tơngah mâu tơdroăng ki xơpá ‘na hlá mơ-éa ki vâ tê ngi kong têa ê kô ôh tá xê tơdroăng ki xơpá xếo. Drêng mâu tơdroăng châ pêi pro tơniăn tơ’lêi, tro pơkâ mê gá kô kơdroh tơdroăng ki pá puât tung chêh pro hlá mơ-éa. Ki kal tâ, kố cho tơdroăng ki xiâm vâ Dak Lak mơjiâng pro kơpong pêt krúa, tơniăn, ai tŭm tơdroăng ki vâ pêi châ tiô tơdroăng púi rơhêng vâ dêi tâi tâng mâu kơchơ tê mơdró kong têa ê”.

Pơkâ kơxô̆ 36 dêi Chin phuh ‘na tơdroăng ki hbru ƀă pơkuâ ngăn mah kơxô̆ kơpong pêt, tíu ki tâ tung kơthung châ pêi pro tung Cổng Dịch vụ công tơnêi têa; tíu ki ai hnoăng tơdah xo, chêh pro klêi mâu hồ sơ châ klâ xoăng râ ăm Vi ƀan hnê ngăn râ cheăm. Tung pơla chêh pro ki ton luâ râ cho 3 hâi pêi cheăng ƀă hồ sơ ôh tá xê hbru ăm mah kơxô̆ vâ tê ngi kong têa ê.

Ƀă Dak Lak cho kong pơlê ki ai ƀăng tơnêi pêt plâi sầu riêng kân má môi lâp tơnêi têa, Pơkâ 36 châ tơngah ôh tá xê lêi tah ki tơvâ tơvân ‘na chêh pro hlá mơ-éa mê ối pro tơdrăng tung tơdroăng ki kơnía, mơdêk ki dâi lĕm dêi mâu kế tơmeăm pêt ƀă ivá tơxup tơbriât dêi kơvâ sầu riêng tung kơchơ tê mơdró kong têa ê.