Pơlê kong kân Hồ Chí Minh pleăng reăng Pôa Hồ Chí Minh, Kăn xiâm hnê ngăn tơnêi têa hneăng apoăng rôh leh tơbâ 50 hơnăm krâ inâi Pôa
Thứ tư, 11:07, 01/07/2026
Tơplôu: A Sa Ly/VOV
Tơplôu: A Sa Ly/VOV
VOV.Xơ Đăng - Kơxo lơ 1/7, khu râ kăn teăng mâ Khu pơkuâ cheăng Đảng pơlê kong kân, Hô̆i đong kuăn pơlê, Vi ƀan kuăn pơlê ƀă Vi ƀan Măt trâ̆n Tơnêi têa Việt Nam Pơlê kong kân Hồ Chí Minh tơkŭm po pleăng reăng tơbâ Pôa Hồ Chí Minh, Kăn xiâm hnê ngăn tơnêi têa hneăng apoăng a Kơdrum reăng um meăn Pôa Hồ Chí Minh, Kăn xiâm hnê ngăn tơnêi têa hneăng apoăng, klăng leh tơbâ 50 hơnăm hâi Pơlê kong kân Sài Gòn – Gia Định hâk tơngăm krâ inâi Pôa Hồ Chí Minh, Kăn xiâm hnê ngăn tơnêi têa hneăng apoăng.
Khu râ kăn cheăng xua pôa Trần Lưu Quang, Khu xiâm kal kí, Kăn pơkuâ hnê ngăn cheăng Đảng Pơlê kong kân Hồ Chí Minh pơkuâ djâ, koh nhuô̆m pâ mơnê hnoăng kân dêi Pôa Hồ Chí Minh, Kăn xiâm hnê ngăn tơnêi têa hneăng apoăng ƀă tơdroăng cheăng kăch măng.
Rơtế hâi ki mê, pơlê kong kân pơxiâm pro hên tơmeăm ki kal xiâm, tung mê ai Kơdrum reăng khôi túa lĕm tro Bến Nhà Rồng – Khánh Hội ƀă Kơdrum reăng loăng ngiât Bến Bạch Đằng. Tơdroăng leh tơbâ sap hâi lơ 1 troh lơ 2/7 u ối tơdroăng ngê̆ thuât, mơđah tơbleăng 3D mapping ƀă pĕng mlŏi reăng a 16 tíu.
Viết bình luận