Tơbleăng mơgêi, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên 6 tơdroăng cheăng pêi ki kal pêi pro, tung mê pê klêi mâu tơdroăng cheăng ki hiăng tâi hâi khế hơnăm pơkâ pêi, mâu tíu ki pá hiăng châ hnê mơhno; ing tơdroăng cho kơ koan xiâm pơkuâ thế pôu râng hnoăng cheăng troh tui lui ‘na tơdroăng pêi pro, ki pêi lĕm lơ ôh tơmeăm khoăng.

Pôa pâ thế, mơdêk mơnhông rah ‘noăng chư chêh ƀă tơdroăng ki xúa tơdjuôm, pro ki pơxúa ăm kơ koan, khu tơrŭm, kuăn pơlê, khu mơdró, chiâng tíu ‘măn rak mâu tơdroăng chêh ‘măn tung kơmăi, veăng mơnhông cheăng kâ kơxô̆ ƀă veăng ‘no hnoăng tâk ăm tơdroăng cheăng kâ.

Pôa Tô Lâm tối pơchân, thế rak tơniăn krá tung măng, tơniăn mâu tơdroăng ăm ‘nâi ƀă kring vế tơdroăng chêh ‘mot tung kơmăi dêi tơnêi têa, xua ki khât ăm hlo, pơ’lêh kơxô̆ thăm trâu rơdâ ki hía mâu tơdroăng kal, châ ‘nâi tơdroăng chêh tung kơmăi, khu ‘mêi pro tơ’nhiê tơdroăng tung măng, chêh tơdroăng ki ôh tá khât, tơdroăng ki ‘mêi thăm rế ó tâ. Pôa tối nhên tơdroăng pơkâ pê klêi tung pơla nôkố cho kih thuât pêi pro, ing tuăn tơchĕng khên tơmiât, khên pêi, khên pôu râng ƀă hnoăng cheăng tơná pêi pro mơhno troăng a hdrối dêi ngế ki pơkuâ xiâm.