Rôh hôp cho ƀâng tơpui tơno ki tiah hmâ pơla kăn pơkuâ ƀă mâu khu mơdró kâ vâ tơmâng xo mâu tơdroăng ki ối tơvâ tơvân sap ing tơdroăng ki ai khât ƀă pêi pro klêi troăng hơlâ tŏng gum. Hơnăm kố, rôh hôp kố pêi pro sap ing tơdroăng ki tŏng gum lêi tah xơpá chiâng rơtế môi tuăn tơdroăng mơjiâng pro troăng hơlâ, séa ngăn khât tung mâu tơdroăng pơkâ dêi Khu xiâm kal kí ‘na mơnhông khoa hok, kong ngê̆, pơhlêh nếo tơmiât pêi rơkê, pơhlêh kơxô̆ ƀă mơnhông cheăng kâ krê.

Pôa Đặng Hồng Anh, Kăn hnê ngăn Khu mơdró kâ hơnăm ố`i nếo Việt Nam ăm ‘nâi, ƀă 34 rôh hôp a kong pơlê rơtế ƀă rôh hôp khu râ kăn xiâm tơpui kâ ƀă Chin phuh, ki xiâm cho tơkŭm tŭm mâu rơkong pâ thế sap ing kong pơlê vâ tŏng gum tiô hnoăng pơkuâ, pro tơ’lêi hlâu tâ ăm khu mơdró kâ mơnhông.

“Ƀă mâu kong pơlê, pơlê kong kân mê ngin pơrá rơtế ƀă mâu khu ki rơkê, khu ki hriăn ‘na khoa hok rơtế ƀă kong pơlê kô tơpui tối leăng, chêh xo tŭm ƀă tối tơbleăng tơdroăng kal; tơmâng mâu rơkong tơpui tối pâ thế ing khu mơdró kâ, khu tê mơdró ƀă chêh xo tŭm mâu rơkong pâ thế pơtroh ăm kong pơlê. Ƀă mâu tơdroăng ki ối tung hnoăng pơkuâ dêi khu xiâm, kơvâ cheăng, Tơnêi têa ƀă Chin phuh mê ngin kô chêh xo tâi tâng tung rơkong tơpui tối pâ thế vâ gum khu mơdró kâ mơnhông tơniăn tro má môi tung chal nếo”.

A rôh hôp, mâu kăn tơkŭm tơpui ‘na pơhlêh hên tơdroăng ki pơkâ mơ’no ƀă Dak Lak môi tiah pêi pro klêi tơdroăng ki ‘no liăn pêi cheăng vâ mơhnhôk veăng tơlo pêi pro túa pơkâ kong pơlê; mơjiâng pro tíu pêi cheăng xing xoăng mâu tơdroăng ki kơnía pêi chiâk deăng tung tíu chêh ‘măn ‘noăng chư chêh; thăm mơdêk pơhlêh xúa kong ngê̆, pơhlêh nếo tơmiât pêi rơkê ƀă mơnhông hê̆ sinh thăi ‘mâi vêh pơxiâm pêi cheăng.

Peăng rôh tơpui tơno mơdoh hên chôu vâ khu mơdró kâ tơpui tơno tơdrêng ƀă kăn pơkuâ kong pơlê ƀă mâu khu ki rơkê ‘na 4 tơdroăng cheăng ki kal, mê cho túa ki pơhlêh chêh pro hlá mơ-éa, xúa tơnêi tơníu ƀă kơxô̆ liăn, pơhlêh xúa kong ngê̆-pơhlêh nếo tơmiât pêi rơkê, rơtế ƀă troăng hơlâ mơnhông kơchơ tê mơdró ƀă mâu ngế pêi cheăng ki rơkê plĕng.

Tung mê, châ xúa tơnêi ƀă chêh pro hlá mơ-éa ‘no liăn cheăng cho tơdroăng ki châ hên khu mơdró kâ kal vâ ‘nâi plĕng. Tiô pôa Nguyễn Huỳnh Vĩnh Huy, kăn hnê ngăn Khu mơdró kâ hơnăm ối nếo Dak Lak, klêi kơ’nâi ‘mot tơkŭm, kong pơlê ai tơnêi mơnhông cheăng kâ kân la khu mơdró kâ xuân ối trâm pá drêng vâ xúa tơnêi xua troăng hơlâ mơéa chêh pro tá hâi klêi.

“Mâu khu mơdró kâ nôkố ai mâu tơdroăng tơkêa bro dế kal tơnêi. Klêi kơ’nâi ‘mot tơkŭm pơla péa to kong pơlê mê khu rak ngăn tơnêi ối hên la nôkố tá hâi ai troăng hơlâ pơkâ xúa tơtro gum khu mơdró kâ châ xúa tơnêi sap ing tơnêi ki mê. Xua mê dế ối tơkôm ing Chin phuh, tơnêi têa ai mâu troăng hơlâ tŏng gum nếo vâ gum khu mơdró kâ”.

Mâu rơkong tơpui tối pâ thế dêi khu mơdró kâ hiăng châ kăn pơkuâ kong pơlê ƀă mâu khu ki rơkê tơpui tơno, pêi pro nhên a rôh hôp. Mâu tơdroăng ki kal tơkâ luâ hnoăng pơkuâ kong pơlê châ Khu tơkŭm po chêh xo tŭm vâ pâ thế mâu khu xiâm, kơvâ cheăng, Tơnêi têa ƀă Chin phuh ngăn, tŏng gum.

Tiô pôa Đỗ Hữu Huy, Kăn hnê ngăn Vi ƀan kong pơlê Dak Lak, klêi kơ’nâi ‘mot tơkŭm, kong pơlê dế pơkâ tơnêi tơníu mơnhông nếo ƀă 3 kơpong mơjiâng, 3 hang lơng cheăng kâ ƀă 2 tíu pêi cheăng xiâm; mơeăm ki têi mơnhông GRDP pơla hơnăm 2026 – 3030 châ sap ing 11% tơngi klêng, GRDP rêm ngế troh hơnăm 2030 châ lối 153 rơtuh liăn.

“Ngin rơhêng vâ mâu khu mơdró kâ, khu tê mơdró, malối cho khu mơdró kâ hơnăm ối nếo rơtế prôk ƀă kong pơlê. Dak Lak nôkố ôh tá xê to ai hên kế tơmeăm pêi lo ing chiâk deăng, kơpong pêt hdrê loăng ton hơnăm kân, khôi túa lĕm tro krê, mê hiăng ai tơnêi mơnhông nếo, kân rơdâ. Vâ prôk hngế tâ, krá tơniăn tâ, pin kal ai tơ’nôm kong ngê̆ pơkuâ ngăn ki tro, kơxô̆ liăn ƀă tơdroăng ki khên tơnôu dêi khu mơdró kâ vâ pro chiâng mơnhông mơdêk nếo”.

Tung rôh po tơdroăng, Vi ƀan hnê ngăn kong pơlê Dak Lak ƀă Khu mơdró kâ hơnăm ối nếo Việt Nam hiăng kĭ hlá mơ-éa chôu vế tơrŭm cheăng ‘na pơkâ mơdêk ‘no liăn cheăng, tŏng gum khu mơdró kâ ƀă mơjiâng khu khu mơdró kâ a kong pơlê.