Tơpui mơgêi rôh hôp, jâ Phạm Thị Thanh Trà, Phŏ Ngế pro xiâm hnê ngăn tơnêi têa tối rơdêi cheăng ‘na mâu ngế hơnăm hiăng krâ đi đo châ Đảng, Tơnêi têa tơmâng ngăn khât. Luâ 7 khế hơnăm 2026 cheăng mâu ngế hơnăm hiăng krâ pêi châ tơƀrê hên tơdroăng, sap ing pêi klêi troăng hơlâ tŏng gum, po rơdâ túa rêh ối kâ ối, tŏng gum ivá troh mơdêk hnoăng cheăng, tíu ối ƀă tuăn ngoâ dêi mâu ngế hơnăm hiăng krâ.

Sap ing nôkố troh tâi hơnăm 2026, Phŏ Ngế pro xiâm hnê ngăn tơnêi têa pơkâ thế pêi pro klêi troăng hơlâ hmâ ƀă tơdroăng ki rế hía rế hên mâu ngế hơnăm hiăng krâ; mơdêk ki rơkê plĕng tung hngêi pơkeăng rak ngăn, pơlât mâu ngế hơnăm hiăng krâ, kơbong phục hồi chưk năng, rak ngăn ton hâi khế, răk ngăn kơdroh iâ; mơdêk rĕng chêh pro hồ sơ rak ngăn ivá tung điê̆n tưh ăm mâu ngế hơnăm hiăng krâ tung lâp tơnêi têa ƀă tơdjêp mâu tíu chêh ‘măn ‘noăng chư chêh ki ai tơdjâk troh.