A  Gia Lai, Vi ƀan kuăn pơlê kong pơlê nếo hnê tối tơdroăng pêi tơdrêng hơnăm 2026, tung mê, ‘no liăn kâng pro rơchôa cho môi tung mâu tơdroăng pêi ki kal dêi kơvâ chiâk deăng, thôn pơlê. Pái to rơchôa ki kân ai tâi tâng kơxô̆ liăn ‘no pro dâng 810 rơtal liăn kô châ tơbleăng pêi pơla hơnăm 2026-2030 vâ ai têa xúa tung pêi klâng chiâk ƀă xúa ôu kâ ăm kơpong peăng mâ Hâi Lu dêi kong pơlê, tíu ki ối hên tơnêi mơnhông pêi chiâk deăng la rơchôa têa hâi ai tiô tơdroăng púi vâ.

Tiô pơkâ, rơchôa Djang a cheăm Kƀang bê têa tôh ăm 800 ha tơnêi pêi klâng chiâk ƀă kô ai têa kum ăm dâng 3.500 ngế kuăn pơlê xúa. Long hdoăng têa Ka Tung a cheăm Tơ Tung pơxúa tôh ăm 1.000 ha tơnêi pêi kâ ƀă kô ai têa vâ ôu kâ hum roh ăm lối 2.600 rơpŏng kuăn pơlê. Long hdoăng têa Đăk Trau Dle a cheăm Kon Chiêng bê têa vâ toh ăm 600 ha tơnêi pêi klâng chiâk, hlối veăng mơ‘no chôa iâ têa ki lu. Pôa Cao Thanh Thương, Ngế pơkuâ ngăn ‘na chiâk deăng ƀă Hyôh kong prâi kong pơlê Gia Lai ăm ‘nâi:

“Kơxô̆ ki tôh hbrâ hdrối ăm tơnêi pêi klâng chiâk kơpong peăng Mâ hâi Lu kong pơlê Gia Lai ối lối 12%, xua mê vâ pơtối rak tơmeăm khoăng ai hlâu ki pơxúa, chiâng kơpong pêi cheăng kân rơdâ dêi kong pơlê ƀă tung kơpong mê thế tơkŭm ‘no liăn kâng rơchôa. Tung Pơkâ hneăng hôp Đảng ƀô̆ kong pơlê Gia Lai hneăng 2025-2030 tơkŭm séa ngăn ‘no liăn mơjiâng pro rơchôa vâ pơtối rak tơmeăm khoăng ai hlâu ‘na tơnêi ki vâ xúa mơnhông pêi chiâk deăng, malối tung tơdroăng pêt báu loăng plâi vâ pơxúa uâ pơliê trâu tơmeăm vâ tê ăm kong têa ê”.

Tung pơla mê Gia Lai tơkŭm tơmâng ‘no liăn kâng ro rơchôa hdoăng têa vâ ai têa tôh loăng plâi ton hơnăm, tung pơla mê Dak Lak tơdroăng cheăng hbrâ, mơdât xía vâ xua kong prâi pro ôh tá tơniăn dế thâ tơbleăng pêi hdrối vâ tối tơbleăng ‘na kong prâi ôh tá tơniăn tung rơnó mêi khía kân. Sap poăng hơnăm troh nôkố, Dak Lak hiăng ai 9 rôh kong prâi pro ôh tá tơniăn mê cho kong mêi kân, xok prăng, khía jâ kơdo  rơvê  ƀă ai tơro têa, pro 1 ngế hlâ, 85 toăng hngêi tơ’nhiê, tâi tâng ki lŭp riân dâng 2,86 rơtal liăn.

Troh tung rơnó mêi, lâp tung kong pơlê ai lối 80 tíu tơnêi tơhnâp, tung mê ai 12 tíu châ ‘nâi nhên rơ-iô kal pêi pro tơdrêng. Ki vâ tối, mơhé hiăng troh rơnó mêi, la xuân ối hlo ôh tá bê têa xuân châ mâu khu râ kơvâ cheăng tối tơbleăng hdrối xua rơchôa têa nốkố nếo bu hdoăng têa bê vâ tôh dâng 23% ƀă tơnêi pêi klâng chiâk, ki hên ƀăng tơnêi ki u ối xuân ối kơnôm ing têa mêi. Pôa Nguyễn Thiên Văn, Phŏ kăn hnê ngăn Vi ƀan kuăn pơlê kong pơlê  Dak Lak pơkâ thế:

“Ƀă mâu tíu pêi cheăng, kơvâ cheăng, mâu cheăm bêng ki tơdjâk troh ing tối tơbleăng hdrối, hbrâ mơjiâng pơkâ, tơdroăng hnê tối troh kuăn pơlê, hbrâ mâu tơmeăm, tâi tâng, xuân tơdroăng ki kal ai dêi tơrêm kơvâ cheăng, ing mâu ngế vâ pêi cheăng vâ rơtế ƀă tâi tâng mâu lêng troh a môi tíu ki kal thế châ môi tuăn dêi pó, ai luât pơkâ tung mâu kăn, pơkuâ hnê mơhno. Drêng ai tơdroăng xía vâ kô tối tơbleăng pêi hlối  hbrâ ví teăm tơdrêng, kơdroh ki hlâ mơngế, lŭp ‘na tơmeăm khoăng dêi Tơnêi têa, dêi kuăn pơlê”.

Tơdroăng Gia Lai mơdêk ‘no liăn pro mâu rơchoâng kân, tung pơla mê Dak Lak mơdêk tăng troăng hơlâ hbrâ, ví xía vâ kong prâi pro ôh tá tơniăn ăm hlo mâu kong pơlê kơpong Tây Nguyên dế pơ’lêh tuăn tơmiât hbrâ ví troh hbrâ rơnáu hdrối vâ hmâ ƀă hyôh kong prâi hơ’lêh. Mâu rơchôa, rơtế ƀă ivá tối tơbleăng hdrối, tơbleăng ƀă hbrâ ví xía vâ kong prâi oh tá tơniăn, kô cho xiâm ki kal vâ tơniăn ăm kuăn pơlê, hlối pơtối mơnhông ‘na chiâk deăng krá ton tung pơla kong prâi rế oh tá tơniăn mêi tô hmâng vâ ôh tá ‘nâi hdrối./.