Sap ing hâi lơ 5/6 troh nôkố, khu lêng kong pơlê Quảng Ngãi hiăng chiâ hên tíu tăng ngăn tung kơpong Ilâng kiâ mố đô̆i a bêng Đăk Cấm ƀă drô troăng Trường Chinh vâ tăng kơxêng kiâ mố đô̆i. Khu ki ai tơdjâk troh pơtroh 3 toăng kơmăi kui, rơxế kân, 3 toăng kơmăi radar tung tơnêi rơtế ƀă hên mâu rơxế, kế tơmeăm kih thuât xúa tung cheăng tí tăng chiâ, rôu.

Kơxo lơ 29/6, khu ki ai tơdjâk hiăng hlo, rôu 1 to kơxêng kiâ mố đô̆i ƀă djâ vêh a hngêi ‘măn vâ pleăng, têk nhăng. Lăm séa ngăn tơdrêng a tíu ki rôu, Thươ̆ng tươ̆ng Lê Quang Minh pơkâ thế khu ki pêi dêi hnoăng cheăng pơtối séa ngăn, tí tăng tiô túa ki rơkê, krâu, pôi tá tro lôi mâu tơdroăng ki klâi ƀă rak tơniăn ăm kăn ƀô̆, mố đô̆i tung pơla tí tăng rôu kơxêng kiâ mố đô̆i.