VOV4.Xơ Đăng -  Mơhế khu râ kơvâ cheăng xuân môi tiah kơvâ Hnê hriâm ƀă hnê mơjiâng tuăn ngôa rơkê kong pơlê hiăng đi đo tâng tối tơbleăng ‘na tơdroăng ai khu ‘mêi heâk pơloi ing măng, la bú tung to lâi hâi kố hdrối kố nah hên thái kô a tơring Đăk Hà, kong pơlê Kon Tum hiăng tro hlôp kơ khu ‘mêi heâk pơloi ing măng bro khu ‘mêi châ kâ lối 1 rơtal 300 rơtuh liăn.

VOV4.Xơ Đăng -  Tiô rơkong krếo thế dêi pôa Vương Đình Huệ - Kăn xiâm hnê ngăn Kuô̆k hô̆i, pôa Vyacheslav Victorovich Volodin, Kăn xiâm hnê ngăn Duma Kuô̆k hô̆i kong têa Rusi pơkuâ djâ Khu kăn xiâm kong têa Rusi lăm pôu Việt Nam sap hâi lơ 15 - 16/10.

VOV4.Xơ Đăng - Kơxê hâi lơ 15/10, pôa Phạm Minh Chính, Ngế pro xiâm hnê ngăn Chin phuh pêi cheăng ƀă kong pơlê Trà Vinh vâ tối mâu tơdroăng pêi pro tung mơnhông cheăng kâ rêh ối, tơleăng mâu tơdroăng pâ thế, pro tơ’lêi hlâu ăm Trà Vinh mơnhông rĕng, krá tơniăn.

VOV4.Xơ Đăng - Hdrối mê, apoăng chôu kơxê, lơ 15/10, klăng roh Leh tơbleăng Sen Dolta hơnăm 2023 dêi kuăn pơlê hdroâng kuăn ngo Khmer Peăng Hdroh, pôa Phạm Minh Chính, Ngế pro xiâm hnê ngăn tơnêi têa troh lăm pôu, rơkâu Khu rŭm môi tuăn pâ nhuô̆m tơnêi têa kong pơlê Trà Vinh a Hngêi Chuô Ông Mẹt (ối tối cho hngêi chuô Kom Pong) a bêng 1, pơlê kong kơdrâm Trà Vinh.

VOV4.Xơ Đăng - Mâu hơnăm hdrối mê hía nah, mâu Kŏng ti kơxu ối tung Ƀinh đoân 15 ki pro đông a kong pơlê Gia Lai hiăng kơjo kum tăng rah xo, hnê mơjiâng mơngế pêi cheăng cho hdroâng kuăn ngo ki iâ mơngế. Tơdroăng ki tơrŭm ƀă kuăn pơlê a kố ti xê to kum pêi tơƀrê tơdroăng pêi chiâk pêi deăng, tê mơdró kâ dêi tơrêm tíu pêi cheăng, mê ối veăng kum mơnhông rêm tơdroăng rêh kâ ối dêi mâu hdroâng kuăn ngo a kơpong kơtiê xahpá a tíu tơkăng kong dêi Gia Lai. Hoàng Qui - Ngế chêh hlá tơbeăng cheăng tung Rơ’jíu Việt Nam a kơpong Tây Nguyên ai chêh tối ‘na tơdroăng mê.

VOV4.Xơ Đăng - Nôkố a kong pơlê Gia Lai dế ai hrĭng tơdroăng tơkêa bro păn mơnăn ki hên ƀă krâ kơvâ. Ki khât ăm hlo, hên tơdroăng tơkêa bro hâi tơniăn tiô pơkâ ‘na hyôh kong prâi, pro tơdroăng rêh ối dêi kuăn pơlê ki ối rơtâ tá chiâng tơdjâk xú ‘mêi ó. Tơdroăng kố hiăng ton hơnăm kố la hâi hlo khu râ pơxâu phak kơtăng ƀă ngế ki pro.

VOV4.Xơ Đăng - Peăng xê hâi lơ 13/10, a tíu pêi cheăng Kăn xiâm hnê ngăn, pôa Võ Văn Thưởng, Kăn xiâm hnê ngăn tơnêi têa hiăng tơdah pôa Hassan Adamu Mamani, Kăn teăng mâ kong têa Nigeria troh koh pơ’lâng, mơgêi hneăng pêi cheăng a Việt Nam.

VOV4.Xơ Đăng - Peăng xêi hâi lơ 13/10, Khu séa ngăn ‘na pêi cheăng kâ xiâm Đảng xua pôa Nguyễn Hồng Sơn, Kăn phŏ pơkuâ hnê ngăn Cheăng kâ khu xiâm Đảng pro pơkuâ xiâm hiăng ai rôh pôu, pêi cheăng a Khu pơkuâ hnê ngăn Đảng kong pơlê Dak Lak.

VOV4.Xơ Đăng - Pơtối tơdroăng tơpui dêi rôh hôp 27, kơxo hâi lơ 13/10, Vi ƀan pơkuâ Kuô̆k hô̆i tơmâng tơdroăng chêh pơtroh ăm Chin phuh ‘na tơdroăng hiăng pêi pro, ki xơpá tơvâ tơvân tung tơbleăng pêi kơxô̆ 03 dêi tơdroăng pơkâ tơnêi têa tung pơla hơnăm 2021-2023 ƀă hlối pâ thế pơkâ troăng rơhlâ pêi pro, luât pơkâ ki xiâm vâ tah ki xơpá, tơvâ tơvân, vâ rĕng châ pêi mâu tơdroăng cheăng tung la ngiâ.

VOV4.Xơ Đăng - Kơxo lơ 13/10, a kong pơlê Ninh Bình, Khu xiâm pơtâng tối tơdroăng kal tơnêi têa pơkuâ, tơrŭm ƀă Khu kăn pơkuâ hnê ngăn kong pơlê Ninh Bình tơkŭm po Hneăng hôp tơpui tơno khoa hok tơnêi têa “Mâu tơdroăng tơpui leăng ƀă tơdroăng nôkố tung mơjiâng Đảng ‘na kal kí, troăng tơmiât, hiâm mơno tung hneăng nếo”.