VOV4.Sêdang - Hâi lơ 12/3, kuăn pơlê a mâu thôn 9, 10 ƀă 11 to cheăm Čư̆ San, tơring M’Drak, kong pơlê Dak Lak, cho tíu tơbleăng tơdroăng tơkêa bro kâng rơchôa 4.400 rơtal liăn Krông Pač thượng, pơxiâm lăm troh a tíu pêi cheăng ki nếo. Kố cho tơdroăng ki kuăn pơlê tung kơpong long têa, ing mâu kăn râ kong pơlê Dak Lak xuân púi vâ tung plâ 12 hơnăm hdrối. Tơkâ luâ tơdroăng ki ôh tá tơniăn, tá mâu tơdroăng ki ôh tá tơniăn, tơdroăng tơkêa bro rôh apoăng hiăng tah ki pá má môi cho tơdroăng ki thế kuăn pơlê ‘mâi xĕn hngêi trăng.  Kố cho rôh ki kal vâ rơchôa têa rơpâu rơtal liăn rĕng châ mơjiâng pro klêi, vâ rĕng ai têa tôh mâu tơbăng klâng báu, loăng plâi kuăn pơlê vâ rĕng xông kân, dâi lĕm, hlối ai pơxúa kân ing mâu rơchôa têa dêi Chin phuh, Kuô̆k hô̆i kĭ tơbleăng mơjiâng pro a Tây Nguyên.

A kơxo má, tâi rơpŏng ai 6 ngế dêi hngêi pôa Liều Văn Sùng, a thôn 9, cheăm Čư̆ San, tơring M’Drak hiăng riu, pơxiâm rơmêt dêi tơmeăm khoăng vâ hbrâ ‘mâi xĕn hngêi trăng ối troh a kopong ki nếo  kơtăn mê ai 30km, ối tung cheăm Čư̆ Êlang, tơring Ea Kar. Klêi kơ'nâi lối 20 hơnăm rêh ối akố, pôa Sùng ối pâ dêi tíu kố la xuân phiu ro lăm ối a tíu ê. Xua kopong ki pro pơlê nếo hiăng châ tơnêi têa xing xoăng tơniăn tơtro ƀă 1 rơpâu met karê tơnêi ối ƀă 1 ha tơnêi pêi kâ, ối a kĭng long têa, ki 'no troh a tíu ối, bu ai to têa xo.

Mâu khu ki kum kuăn pơlê a long têa Krông Pač thượng ‘nhiê tah hngêi

Tíu ối nếo cho achê tơdế cheăm, on tơhrrik, hngêi trung hriâm, hngêi pơkeăng pơrá châ 'no liăn mơjiang bro tơniăn lĕm, tơhrâ kô kum ropŏng pôa Sùng ai môi tơdroăng rêh ối tơniăn lĕm tâ:

“Á tơmiât kơ’nâi hdrối xuân lo ing kố, rế rĕng lo rế tro vâ ai tơdroăng rêh ối nếo. Tâng ối a tíu ton gá xơpá khât, ôh tá hêng vâ pêi klâi ôh, kong tô, ngôi kơtâk, kong mêi troăng trâp hliâk, tâng vâ pơchông ƀă kopong ki pro pơlê nếo kopong kố gá tơniăn tâ tung rêh ối”

Vâ tŏng kum kuăn pơlê ‘mâi xĕn, tá péa tơring M’Drak ƀă Ea Kar pơrá pơtroh lối hrĭng ngế, tung mê ai tá khu ki rak vế tơniăn, kăn ƀô̆, đảng viên, đoân viên, droh rơtăm troh veăng kum kuăn pơlê. Rơxế chơ tơmeăm khoăng, hngêi trăng kuăn pơlê xuân môi tiah hbrâ rơnáu, hlo hơniâp ro môi tiah hâi mơdĭng. Veăng ‘nhiê tah hngêi, ngoh Y Ten Niê, kăn pơkuâ ngăn Đoân Droh rơtăm pơlê kân M’Drak, tơring M’Drak, ăm ‘nâi, mâu vâi pú đoân viên droh rơtăm hiăng xing xoăng hnoăng cheăng, vâ rak tơniăn hiâm mono ƀă ivá ăm rôh kum kuăn pơlê ki ton hâi:

“Tơdroăng ki ‘mâi xĕn kuăn pơlê hâi kố gá kơhnâ, pêi pro tơdrêng. Đoân viên, droh rơtăm ƀă mâu tíu pêi cheăng tơrŭm mê kơhnâ veăng tŏng kum kuăn pơlê vâ vâi rĕng tơniăn tung rêh ối. Xing xoăng tiô khu, hâi kố khu ki kố ƀă kơxo ah khu ki ê veăng pơtối kum kô rak tơniăn ivá ăm nhŏng o ƀă drêng lâi xuân hbrâ rơnáu pêi dêi hnoăng cheăng”.

Xua tíu lo, a tíu troh cho kopong pro pơlê nếo koxô̆ 1, cheăm Čư̆ Êlang, tơring Ea Kar, mâu khu lêng xuân hbrâ rơnáu vâ tŏng kum mơdâng pro hngêi, tơniăn tơdroăng rêh ối. Pôa Trần Văn Thanh, kăn hnê ngăn Vi ƀan cheăm Čư̆ Êlang ăm 'nâi, a kopong pro pơlê dêi cheăm hiăng hbrâ rơnáu vâ 230 ropŏng kuăn pơlê, 1.150 pơ'leăng mâ mơngế kopong long têa Krông Pač thượng troh rêh ối. Akố, mâu kế tơmeăm xúa ki kal môi tiah têa krúa, on tơhrik, troăng, hngêi pơkeăng, tơnêi ối ƀă tơnêi pêi kâ pơrá hiăng châ 'no liăn, xing xoăng tơtro. Khu kăn pơkuâ cheăm kô kum tâi ivá vâ kuăn pơlê rĕg hmâ ƀă tíu ối nếo kố:

Rơxế chơ tơmeăm, hngêi kum kuăn pơlê đi đo chơ tê kơtê ƀă hbrâ rơnáu chơ

“Cheăm xuân hiăng mơjiâng túa pơkâ, tơrŭm ƀă mâu ƀơrô cheăng dêi tơring, ngin hiăng hbrâ rơnáu khu lêng xuân môi tiah mâu khu ki gak vâ tơdah vâi krâ nhŏng o. rak tơniăn rĕng má môi ‘na tơdroăng rêh ối. Ngin kô mơ-eăm tâi ivá tơná vâ mơdâng hngêi ăm vâi krâ nhŏng o, pro tiah lâi 1 troh 2 hâi gá hiăng tơniăn. Mâu vâi muăn lăm hriâm mê ngin tơhrâ tung 2 hâi”.

Veăng tung hnoăng cheăng hnê mơhno kum kuăn pơlê ‘mâi xĕn troh kơpong ki pro pơlê nếo, pôa Nguyễn Đình Thìn, kăn phŏ pơkuâ Khu rak ngăn tơdroăng tơkêa ‘no liăn cheăng mơjiâng pro troăng prôk ƀă pêi chiâk deăng kong pơlê Dak Lak ăm ‘nâi, ai lối 700 rơpâu rơpŏng kuăn pơlê kơpong long têa Krông Pač thượng ối tung khu ki tro ‘mâi xĕn vâ kum ăm tơdroăng tơkêa. Klêi kơ’nâi 12 hơnăm, troh nôkố hiăng pêi pro klêi tơdroăng ki ‘mâi xĕn kuăn pơlê vâ xo tơnêi cho tơdroăng ki ro. Laga, tơdroăng ki ‘mâi xĕn tâi tâng mâu rơpŏng cho tơdroăng ki kal má môi, pâ thế ai tơdroăng ki veăng tŏng kum hên dêi khu râ kăn pơkuâ sap ing cheăm troh kong pơlê, malối cho kal tơdroăng ki hlê plĕng, môi tuăn dêi kuăn pơlê:

Kơpong kuăn pơlê rêh ối châ ‘no liăn tơtro ƀă tŭm mâu kế tơmeăm ki kal

“Chiâng vâ tối tơdrăng, akố kal athế ai tơdroăng ki môi tuăn mơ-eăm dêi kuăn pơlê. ‘Na khu ki veăng kum mê ngin rak tơniăn tâng kuăn pơlê kơhnâ, tơdroăng ki ‘mâi xĕn mơni kô klêi hdrối hâi lơ 304, hrá má môi cho 30/6. Laga, á xuân tối nhên kuăn pơlê cho ngế ki pơkâ xiâm. Kuăn pơlê môi tuăn hên tâ nếo, hbrâ kơchăng tŏng kum, ngế ki lăm hdrối kum ngế ki lăm kơ’nâi, pơlê cheăm kum dêi rơpó mê hnoăng cheăng kố kô rĕng klêi”.

Tiah mê, klêi kơ’nâi 12 hơnăm tơkôm, kuăn pơlê a kơpong long têa Krông Pač thượng hiăng pơxiâm châ ‘mâi xĕn troh a kơpong ki pro pơlê nếo ƀă tơhrâ ‘na môi tơdroăng rêh ối nếo tơniăn lĕm tâ. Tơdroăng tơkêa hiăng hrá, thăm nếo ai drêng ki ‘nâ trâm ôh tá tơniăn. A khế 9/2020, xuân ối ai mâu tơdroăng ki tơtŭng tơpeăng, rêm pâ ki ai tơdjâk troh tơpôu xôi dêi rơpó ‘na tơdroăng ki pêi pro hrá. La tơkâ luâ tâi tâng, ƀă tơdroăng ki veăng tŏng kum kơhnâ sap ing Khu xiâm ngăn chiâk deăng ƀă mơnhông mơdêk thôn pơlê ƀă kong pơlê Dak Lak rơtế ƀă khu pơkuâ tơdroăng kal kí a râ cheăm, tơring ƀă malối cho tơdroăng ki hơ’leh tuăn hiâm dêi kuăn pơlê, tơdroăng tơkêa long têa rơpâu rơtal liăn kố dế rế hía rế châ pơkâ tơleăng tơniăn. Tâng tơ’lêi hlâu, tơdroăng tơkêa kố mơni kô klêi ƀă ăm xúa tiô pơkâ ki Chin phuh, Kuô̆k hô̆i hiăng ‘mâi rơnêu cho mơ’nui hơnăm 2021.

Công Bắc chêh

Katarina Nga tơplôu ƀă tơbleăng